Per sminuir ils disturbis da canera vulan pliras citads svizras introducir zonas da tempo 30 sin numerusas vias principalas. Uschia planisescha sulet il chantun Turitg 31 tals trajects, sco che la gasetta «NZZ am Sonntag» rapporta. En Berna planiseschian ins 22 projects ed er a Genevra, Losanna, Lucerna e Zug èn talas zonas en planisaziun.
Dentant haja dà plirs recurs cunter questas reducziuns dal tempo. Pir dacurt ha Tribunal federal refusà in da quests recurs a Basilea. Tenor il tribunal saja la mesira commensurabla. Ina part dals recurs è dentant anc pendenta.
82'000 persunas han gia profità ils davos 10 onns
Tenor l'Uffizi federal per ambient hajan ins ils davos onns pudì proteger radund 82'000 persunas da caneras da traffic excessivas. Quai cun surtrair las vias cun substanzas che reduceschan la canera, cun mirs che frainan la canera u pia cun zonas da tempo 30.
La finamira da la Confederaziun è ch'ins possia proteger ulteriuras 100'000 persunas da grondas caneras.
RR novitads 06:00