En il cas d'urgenza vul la Confederaziun segirar la furniziun da gas or dals pajais vischinants . Ina cunvegna cun la Germania dettia dentant mo ensemen cun l'Italia, di il vicechancelier da la Germania Robert Habeck.
Tenor SRF han ils Cussegliers federals Guy Parmelin ed Albert Rösti acceptà quella pretensiun da la Germania a l'ur dal WEF. Per la Svizra saja impurtant che tuts clients vegnan tractà en medema moda, e che nagin vegn a la curta en il cas da crisa. I giaja era per la solidaritad da l'entir nord cun l'entir sid, uschia Rösti vinavant.
Tenor Albert Rösti saja la purschida cun energia en omadus pajais segirada. «Nus avain ina bler pli stabila situaziun che prevesida la stad», ha er il vicechancelier Robert Habeck confermà. Plinavant di el che la Germania vegn a sa cumportar en moda solidarica.
Gia l'onn passà ha la Germania e la Svizra annunzià da negoziar ina cunvegna da solidaritad da gas. Che quai na saja gartegià fin uss, n'haja tenor Rösti dentant nagin connex cun ils problems davart la cunvegna da basa.
