La chareschia en Svizra daventa pli flaivla, e tuttina custan ils legums svizzers uss da mesa stad bler dapli che la primavaira. La differenza è tranter 20 e 60%, sco ina retschertga da la revista Beobachter mussa.
Las grondas firmas dal commerzi en detagl din ch’ellas stoppian actualmain pajar dapli als producents, pia als purs ed a las puras. La primavaira è il martgà svizzer anc fitg avert per legums da l’exteriur, e lura èn ils pretschs dètg bass. Pli tard entra dentant en funcziun ina barriera da duana che protegia il martgà svizzer.
L’Uniun svizra dals producents da legums refusa la critica. Els possian pir la stad pretender ils pretschs ch’els dovrian atgnamain per curclar tut ils custs. Durant tschellas periodas lavurian els deficitar, perquai ch’il squitsch da l’exteriur sin ils pretschs saja lur simplamain memia grond.
In strair vi e nà
Tgi che profitescha la finala da las marschas autas sin ils legums svizzers, resta in pau nuncler tenor il Beobachter. Fatg è ch’il Cussegl dals chantuns vul perfin anc prolungar la fasa cun ina duana da protecziun pli auta. Tar tomatas duai la protecziun da nov durar dal 1. da matg fin ils 20 d’october, pia il dubel ditg d’enfin uss.
Il Cussegl federal na va dentant betg simplamain d’accord cun questas ideas. Ed il Cussegl naziunal vul mo approvar la prolungaziun da la barriera da duana, sch’ils detaglists svizzers sco Coop e Migros sustegnan quai.
