Il Cussegl federal annunzia emprimas mesiras per spargnar tar la Posta. Quellas dattan avant la direcziun per ina revisiun che duai ir en consultaziun il favrer 2025.
Per l'ina duain mo pli 90% da las brevs e dals pachets vegnir furnids sin il termin. Enfin uss èn quai stà 97% tar las brevs e 95% tar ils pachets.
Per l'autra duai betg pli dar in'obligaziun da purtar posta l'entir onn a mintga chasada che vegn abitada. Quella obligaziun datti dapi il 2021.
Las midadas van anc en consultaziun il favrer. Cun las midadas vegnia il provediment da basa da la posta garantì.
Cun las duas mesiras duai la Posta spargnar 45 milliuns francs enfin il 2026. A lunga vista dovria dentant ina modernisaziun profunda da l'ordinaziun da basa. Er per quella duai i dar emprimas finamiras il 2025.
Il cusseglier naziunal Martin Candinas (AdC) quinta che las mesiras van sin ils custs da la periferia. En vitgs pitschens ed aclauns «n'ha la posta nagina autra concurrenza, e betg en las citads e las aglomeraziuns nua ch'i ha ina fitg gronda concurrenza. Da quai anora stuain nus da las regiuns perifericas far gronda attenziun che nus da las regiuns perifericas n'essan la fin betg ils perdents».
La fin finala muntia pli pauc servetsch er in dischavantatg economic. Per interpresas vegnia pli pauc attractiv da lavurar en la regiun.
Il cusseglier federal Albert Rösti, che ha preschentà oz las mesiras, ha fatg attent che la gronda mesira da spargn, da serrar 170 filialas, vegnia cunzunt a tutgar las aglomeraziuns e las citads.
