La Confederaziun vul pussibilitar a la populaziun svizra in svelt access tar il vaccin da Covid-19. Perquai aveva il Cussegl federal gia concedì in credit da 300 milliuns francs. A la sesida dad oz ha il Cussegl federal decis d'auzar quai credit per ulteriurs 100 milliuns francs.
Perquai ch'ins sappia anc betg dir tge producents da vaccins che introduceschan il vaccin sco emprim, prenda il Cussegl federal en mira plirs producents. L'augment dal credit è neccessari per pudair realisà l'acquisiziun dal vaccin e far contracts cun plirs producents.
Per il mument ha la Confederaziun contracts cun dus producents da vaccins. Per ina cun la firma Moderna e per l'autra cun la firma AstraZeneca. Tar la firma Moderna ha la Confederaziun gia reservà 4,5 milliuns dosas da vaccinaziun. Tar la firma AstraZeneca èn gia 5,3 milliuns dosas da vaccinaziun reservadas. L'uffizi da sanadad va da quai anora ch'i pudess dar il vaccin en l'emprima mesadad da l'auter onn.
Naginas ulteriuras mesiras
Tenor il cusseglier federal èn per il mument naginas ulteriuras mesiras planisadas. Per schluccadas saja la situaziun il mument dentant anc memia precara. Las ospitalisaziuns prendan anc adina tiers. La populaziun duai vinavant resguardar las mesiras d'igiena.