Il Cussegl federal ha decidì da trametter ina proxima schluccada en consultaziun. Quella valess tut tenor a partir dals 22 da mars, il termin è dentant anc fitg intschert.
Tranter auter fiss puspè lubì:
- ustarias e bars pon avrir lur terrassas
- occurrenzas cun public: ordadora cun 150 persunas, endadens cun 50 persunas – i vala dentant ina restricziun dad in terz da la capacitad normala dal spazi, e plinavant in obligatori da seser e da purtar mascrina
- inscunters privats a chasa cun 10 persunas
- sut tschertas circumstanzas: activitads sportivas e culturalas era per creschids, en gruppas dad enfin 15 persunas
- instrucziun da preschientscha era per scolas autas
- nagin obligatori da mascrina en chasas d'attempads per persunas vaccinadas
Sche e cura che questas schluccadas pon dentant insumma esser pussibla è anc avert, e dependia fitg da la situaziun epidemiologica. Per la decisiun s'orientescha il Cussegl federal sin basa da quatter criteris:
- Ils 17 da mars na dastga l'inzidenza da 14 dis betg esser pli auta ch'il 1. da mars – cura che l'emprim pass da schluccar è succedì. L'inzidenza da 14 dis dumbra ils cas novs dals ultims 14 dis pro 100'000 persunas.
- La rata positiva (cumpart da tests positivs) duai esser sut 5%.
- La valur da reproducziun (valur R) duai esser sut 1 en media da 7 dis.
- Maximalmain 250 letgs sin staziuns intensivas dastgan esser occupads en Svizra cun pazients da Covid-19.
Uschia è la situaziun actuala:
Offensiva da tests vala a partir da glindesdi
A partir dals 15 da mars surpiglia la Confederaziun tut ils custs per ils tests svelts da corona. Quai vala pia era per persunas che n'han nagins sintoms dal virus.
Examens finals duajan avair lieu regular
Ils examens da matura sco era ils examens finals d'emprendissadi duain avair lieu sco usità. Sche quai n'è betg pussibel ord vista epidemiologica, ha il Cussegl federal decis regulaziuns excepziunalas.
Il Cussegl federal vegn a decider a chaschun da sia proxima sesida ils 19 da mars davart ils proxims pass.