Il Cussegl ha ditg il mardi gea a la lètg per tuts. El ha approvà la proposta, ch'ils verd-liberals avevan lantschà avant set onns, cun 22 tar 15 vuschs. Verifitgada n'è quella dentant betg.
Tge definiziun ha la lètg?
Ch'il Cussegl vegnia insumma a tractar la proposta il mardi n'era betg cler. Ina minoritad, cunzunt commembers da la PPS e la PCD, vulevan sco emprim adattar la definiziun da la lètg en la constituziun. La lètg tradiziunala stettia numnadamain per la lètg tranter um e dunna e stoppia ord quest motiv vegnir adattada hai giu num ord las retschas da las duas partidas. Per pèrs da la medema schlattaina na possian ins betg simplamain surprender il terminus actual.
Che la legislativa e betg ina dretgira definescha la constituziun sa sgrifla cun la separaziun da las pussanzas.
Nunsenn hai giu num ord retschas da la PS e la Verda. L'artitgel dispitaivel è numnadamain il suandant: «Il dretg sin lètg e famiglia è garantì» e quel saja clers avunda:
Tge vulais Vus anc adattar? Igl è tut cler.
La muntada da la lètg saja sa midada. Ord quest motiv na stoppian ins er betg adattar la constituziun. A la fin ha il Cussegl dals chantuns decis da refusar la proposta da renviada. Quai dentant be cnap cun 22 tar 20 vuschs.
Differenzas tar la donaziun da sem
La proposta n'è dentant anc betg verifitgada. I dat numnadamain differenzas tranter las duas chombras. Il Cussegl dals chantuns è bain da l'avis che pèrs lesbics duain survegnir access a la donaziun da sem. El ha dentant surpiglià ina formulaziun pli differenziada ch'il Cussegl dals chantuns. Ord quest motiv va la proposta anc ina giada enavos al la chombra gronda per eliminar las differenzas.
