Las pajas duajan crescher l’onn che vegn en general per 3,5% fin 4,5%, quai ha pretendì l’Uniun tetgala dals sindicats Travail Suisse davant las medias a Berna. La raschun saja che las pajas effectivas dals lavurers e las lavureras sajan sa reducidas ils ultims dus onns pervi da la chareschia. Cunzunt tar ils mastergns artisanals ed il sectur da sanadad sajan augments da paja marcants inditgads.
Tenor Travail Suisse sajan las reservas correspundentas avant maun, quai mussian augments cuntinuants da la productivitad e dals gudogns da manaschi ch'èn entant pli gronds che anc avant la pandemia.
Gia l’entschatta da fanadur aveva l’Uniun sindicala svizra pretendì in augment da 5%. Quai ha l’Uniun svizra da las patrunas e dals patruns refusà immediat. In tal augment saja ni giustifitgà ni supportabel.
