La Confederaziun cumpra dal concern da farmazia Pfizer 12'000 stgatlas dal medicament cunter corona «Paxlovid». Cun quel duajan vegnir tractads pazientas e pazients ch’han in risico pli aut d’in decurs da la malsogna pli grev. Anc quest mais duajan tschertas pazientas e pazients vegnir tractads cun il nov medicament en furma da tablettas, quai ha communitgà la Confederaziun. En ina segunda fasa duaja lura er pussibel da retrair il medicament che pretenda in recept tar medis da chasa ed apotecas.
Paxlovid n’è actualmain anc betg lubì. Sin basa d’ina ordinaziun da Covid-19 po il medicament gia vegnir duvrà durant la procedura d’admissiun.
