Per la cumissiun federala da medias (Emek) èsi cler ch'il service public medial sto sa sviluppar vinavant. Dentant na sajan ni l'iniziativa da 200 francs, ni la proposta dal Cussegl federal la dretga via.
Il gremi dad experts independents vul ina discussiun da princip sur dal service public medial – sur da la legitimaziun, la purschida, structura ed era sur da la finanziaziun da quel. La cumissiun preschenta gist ina ina proposta co quest svilup pudess vesair ora.
Cuntinuitad per la populaziun
Per la cumissiun è il service public oravant tut periclità en las regiuns perifericas, e tar singulas linguas – quai pervi da la situaziun economica tendida, sco era pervi da las tendenzas da centralisar ils servetschs medials. Il service public medial porschia ina pussaivladad da coesiun e da participaziun per tuts. Perquai ch'el è finanzià dal maun public ed ha in mandat da prestaziun, sto el sa differenziar da purschidas commerzialas – saja quai en la qualitad, professiunalitad sco era la relevanza da las prestaziuns.
Transfurmaziun multimediala
Cun il svilup medial vegnan las incumbensas dal service public adina pli grondas – cumpareglià cun il temp cura ch'i deva be radio. I na dettia nagina alternativa al svilup vi tar ina purschida multimediala, per pudair satisfar las pretensiuns dal public. Per l'Emek èsi cler ch'il service public sto era surpigliar novas incumbensas, sco per exempel porscher ina plattafurma per discussiuns publicas.
Sa differenziar da la purschida commerziala
L'Emek cusseglia da
- porscher il service public medial a l'entira populaziun, en tut las parts dal pajais, sco infrastructura moderna – independenta dal furnitur da la prestaziun.
- definir pli exact il cuntegn dal service public medial, e da differenziar quel cleramain da la purschida commerziala.
- midar il sistem da finanziaziun. En il futur duai il service public desister cumplainamain d'entradas entras reclama – e vegnir finanziada cumplainamain dal maun public. Quai per evitar ina faussa motivaziun e salvar l'independenza publicistica. Reclama fiss anc lubida en la televisiun, las entradas sustegnessan dentant ina promoziun da medias generala.
Emprimas reacziuns
La SRG SSR beneventa che l'Emek è cunter l’iniziativa da 200 francs e che quella fa attent sin las consequenzas dal sbassament planisà da la taxa da radio e televisiun sin 300 francs. Sin la proposta da la Emek da finanziar il service public senza daners da reclama di Edi Estermann, pledader da medias da la SRG SSR, ch'ins stuessi lura cumpensar quels daners cun autras entradas. I sa tracta dad ¼ da las entradas da la SRG SSR che vegnan generadas cun reclama e sponsoring. L’intent da la Emek fiss da finanziar tut il service public tras daners dal maun public. Co exact, duai vegnir decidì da la politica.
Ins sto sco emprim dir tge che nus duvrain e lura guardar co finanziar quai tras il maun public. E tenor nus dovri dapli per il provediment da basa, che quai che nus avain enfin uss.
Critic envers las recumandaziuns è l’associaziun d’editurs «Schweizer Medien». Il mainagestiun Stefan Wabel crititgescha che l’intent saja pauc realistic e resguardia memia pauc ils privats.
