Suenter in inscunter han chantuns e Confederaziun anc ina giada fatg attent, d'esser precaut pervi da la varianta dad omicron che circulescha. Uss saja temp per reducir ils contacts per evitar anc dapli infecziuns.
En il center dal barat èn dentant stadas las capacitads dals ospitals. Tenor il minister da sanadad Alain Berset, e la vicepresidenta da la Conferenza svizra da las directuras e directurs chantunals da sanadad Rebecca Ruiz, stattan uss grevas emnas avant porta. La situaziun saja intscherta. Ins stoppia esser precaut, dentant betg chaschunar alarm. La strategia svizra haja fin uss funcziunà. Per il mument è la situaziun en ils ospitals supportabla. Avess quai da midar, pon ins reagir. Plinavant han els fatg attent sin las capacitads dals labors. Actualmain èn quellas al limit. Perquai han chantuns e Confederaziun fatg attent ch'ins stoppia priorisar tar ils tests.
Capacitads da test na tanschan strusch
Però n'èn ils labors pervia da las bleras infecziuns betg pli abels d'analisar tut ils tests a curta vista. Perquai han chantuns e confederaziun fatg attent ch'ins stoppia priorisar tar ils tests – quai che singuls chantuns fan gia. Eventualmain stoppian las scolas restrenscher tests repetitivs ha il minister da sanadad Alain Berset ditg. Berset ha dentant era manegià che la populaziun saja sa tegnida bain vid las mesiras da corona – e quai haja gidà a betg surchargiar ils ospitals.
