Il dumber da las infecziuns confermadas cun il coronavirus è s'augmentà entaifer in di per 547 sin passa 22'000. Quai ha communitgà l'Uffizi federal da sanadad. Cunquai sa conferma il fatg che la curva d'infecziun tschessa.
Oz è il terz di en seria ch'il dumber da las infecziuns novas è sut 600. Uschiglio era quest dumber enturn milli. Tenor l'Uffizi federal da sanadad ha la Svizra ina da las pli autas quotas d'infecziuns novas da l'Europa.
Grad da derasaziun è uss linear
Entras las mesiras che valan il mument dat ina persuna ch’ha il coronavirus anc vinavant quel ad ina persuna. Avant las mesiras che valan dapi mez mars derasava ina persuna infectada il virus a duas fin trais persunas. Quai mussan calculaziuns da la scola politecnica federala Turitg (ETH). Il dumber da cas novs creschia uss linear e betg pli exponenzial. Uschia saja la situaziun uss stabila, dentant n’hajan ins anc betg pudì far rempars a l’epidemia, concludan ils scienziads da la ETH Turitg.
WHO avertescha da tegnair la dira
Il biro d'Europa da la WHO, l'Organisaziun mundiala da la sanadad avertescha da betg schluccar memia baud las mesiras cunter il coronavirus. Uss na saja betg il temp da schluccar las mesiras. En quest maraton hajan nus anc ina lunga via davant nus, ha ditg Hans Kluge, il directur regiunal da la WHO ad ina conferenza da medias ch'è vegnida emessa online.
Kluge ha ultra da quai accentuà ch'il cumbat cunter la crisa da corona stoppia vegnir coordinà sin livel internaziunal.
