Il dumber d'infecziuns stagneschian actualmain sin in nivel fitg aut. Ins stoppia dentant quintar, che la cifra inuffiziala saja in bun toc pli auta. Quai ha ditg Virginie Masserey, manadra da la secziun per controlla d'infecziuns dal BAG, oz envers las medias. L'Uffizi federal da sanadad quinta, che la cifra inuffiziala saja trais fin quatter giadas pli auta. Bleras persunas s'infecteschian senza sintoms. Las incidenzas sajan fitg differentas tranter ils chantuns. Il punct culminant da l’unda omicron pudess bainprest arrivar, uschia Virginie Masserey.
Il BAG annunzia 29'142 novas infecziuns entaifer las ultimas 24 uras. Cun quai è la media dals ultims 7 dis 1% sur quella da l'emna avant. Il BAG annunzia plinavant 14 ulteriurs mortoris en connex cun il virus. Il dumber da novas ospitalisaziuns sajan stabilas e sajan en media sut 20 pro di. Areguard la situaziun sin las staziuns intensivas saja quella il mument stabila.
Virginie Masserey fa plinavant attent, da tegnair en vinavant las mesiras actualas e da dar adatg. Ella recumonda da sa laschar vaccinar e dad er laschar far la terza vaccinaziun, il booster.
Squitsch sin chantuns resta aut
Malgrà ina quarantina ed isolaziun pli curta: Las autoritads chantunalas hajan anc adina fitg bler da far. Quai ha ditg Rudolf Hauri, il president da l'Uniun da medias e medis chantunals. Las capacitads per testar e contact-tracing sajan al limit. Plinavant stoppian ils chantuns er controllar ils concepts da segirtad.
En blers lieus vegnian las persunas infectadas supplitgadas via SMS dad infurmar sez las persunas ch'han gì contact cun ella, uschia Rudolf Hauri. L'isolaziun pli curta portia dentant in levgiament per persunas infectadas asymptomaticas.
Tenor Rudolf Hauri, na vesian ins actualmain nagina «unda da persunas malsaunas» en ils ospitals. Las differenzas regiunalas sajan dentant grondas.
Booster per uffants da 12 fin 15 onns
Per sa proteger meglier da la varianta omicron duain era uffants e giuvenils tranter 12 ed 15 onns bainprest sa laschar vaccinar ina terza giada. Actualmain saja la Cumissiun federala da vaccinaziun vida formular ina recumandaziun correspundenta. Quella duai esser pronta la fin da quest'emna. Studis han mussà, che la vaccinaziun da booster gida dad esser preperà meglier cunter in’infecziun cun la varianta omicron.
Actualmain è la terza dosa mo recumandada per persunas creschidas, ch’han gì la davosa vaccinaziun avant dapli che quatter mais. Persunas sut 16 onns èn per il mument exclus da la vaccinaziun da rinfrestgament. Per ellas n’è quella anc betg dada libra.
