Er suenter las mesiras drasticas da l'Italia dastgan ils cunfinaris talians vegnir en il Tessin per lavurar. Quai han las autoritads decidì. Mintga di vegnan passa 60'000 cunfinaris da l'Italia per lavurar en il Tessin.
Ins persequiteschia il svilup e saja en contact cun il Cussegl federal, quai ha ditg il president da la regenza dal Tessin Christian Vitta vers RSI, paucas uras avant che las novas ordinaziuns èn vegnidas publitgadas.
Il traffic da tren tranter l'Italia e la Svizra n'è betg tangà. Tenor l'SBB curseschan ils trens tranter ils dus pajais tut normal.
Be 8% dals Svizzers valitescha privel sco grond
La gronda part da la populaziun Svizra è d'accord cun las mesiras da prevenziun da la Confederaziun pervi dal coronavirus. Il scumond da manifestaziuns grondas saja commensurà. Da quest avis èn passa 3/4 da las persunas dumandadas. Tenor enquista da l'institut Link sa sentan 2/3 dals dumandads betg u strusch periclitads, 24% valiteschan il privel sco mez grond ed 8% sco grond. La retschertga è vegnida fatga tranter ils 3 e 6 da mars, dumandà han ins 1'074 persunas.
Novas recumandaziuns per la populaziun
Venderdi suentermezdi ha il Cussegl federal infurmà davart ils aspects publics, economics e las mesiras cunter il virus. Els han era dà recumandaziuns per il mund professiunal.
Consequenzas per l'economia
L'epidemia pertutga dentant er l'economia da la Svizra. La Confederaziun vul perquai sustegnair interpresas pertutgadas. La SECO tschertga soluziuns per las branschas pertutgadas dal coronavirus, quai èn schliaziuns sin mesira ed a curta vista.
Ord l'archiv
RTR novitads 09:00
