Oz cumenza en Svizra l'offensiva da tests da corona. A partir dad oz glindesdi èn tut ils tests gratuits per tut las persunas, independent da lur sintoms. Per il Cussegl federal è l'offensiva da test in pass impurtant per pudair schluccar las mesiras da corona.
La Confederaziun surpiglia uschia dasper ils custs per tests da PCR er ils custs per tests svelts. Uschespert ch'il BAG dat liber per il martgà ils tests svelts, po mintga persuna en Svizra retrair gratuitamain en in'apoteca 5 tests per mais. Interpresas e scolas duajan ultra da quai pudair far gratuitamain tests da pool. Pajar sez ston ins uss be pli per tests da PCR per pudair entrar en in auter pajais.
L'offensiva da test ha surtut en mira dad interrumper chadainas d'infecziuns tar cas senza sintoms ed er da franar la derasaziun da la nova varianta dal coronavirus.