En il chantun Tessin vala actualmain fin la fin da mars il stadi d'urgenza. Tut ils kinos, teaters, clubs, center da fitness e pendicularas restan serrads. Era gimnasis e scolas professiunalas èn vegnidas serradas.
Mirella Zen viva cun sia famiglia a Biasca. Naschida e creschida si è ella en la Val Müstair. Ses studis da la scienza da communicaziun ha ella fatg a l’Universitad da Lugano. Dapi l’onn 2008 lavura ella tar Radiotelevisiun da la Svizra taliana e s’occupa là da la vendita dals programs. Per RTR fa Mirella Zen adina puspè contribuziuns per il format «ils auters» .
Bleras famiglias han il tat e la tatta che tgiran ils uffants, quai mida bler en l'organisaziun da la famiglia, perquai ston blers ussa era lavurar davent da chasa. Tscherts geniturs speran che las scolas vegnan prest serradas.
En il mument occupa cunzunt la situaziun en scola Mirella Zen. Ella ha numnadamain duas figlias, ina va a scola ed ina a scolina. Actualmain pon omaduas anc ir a scola. Il chantun Tessin ha sulettamain serrà las scolas publicas e privatas, che porschan ina scolaziun suenter il temp da scola obligatoric.
RTR, novitads 12:00