La PLD na vuleva betg che tut ils custs vegnian puspè surprendì. Pervia dal princip dal chaschunader saja raschunaivel da laschar pajar mintgin per tests per occurrenzas privatas. Quai ha ditg cusseglier naziunal Martin Dobler dal chantun Son Gagl.
La cumissiun da sanadad dal Cussegl naziunal, ch'è stada responsabla per las discussiuns preliminaras, è dentant da l'opiniun che testar saja part da la strategia da 3G, ed i saja meglier da testar che da far nagut. Perquei saja quai giustifitgà che la Confederaziun surprendia ils custs.
Plinavant ha il Cussegl naziunal agiuntà in clausula da protecziun da datas. Las datas che vegnan rimnadas en connex cun il contact-tracing, duain vegnir stizzadas sin il pli tard dus onns suenter.
PPS ha vulì limitar la lescha – tut las propostas refusadas
La Partida populara svizra ha empruvà da restrenscher las mesiras per «terminar la divisiun da la populaziun», ha ditg Thomas De Courten dal chantun Basilea-Champagna. La PPS vuleva che la lescha cuntegnia che scumonds da sortir per persunas betg vaccinadas sajan sclaus.
Vinavant duess il certificat puspè vegnir duvrà sco previs l'entschatta. I na saja mai stà l'idea che quel vegnia duvrà tar festas da Nadal. Ils cunfins duain vegnir controllads sistematicamain ed i duai dar dapli plaz en las staziuns intensivas dals ospitals. Tut quellas dumondas èn vegnidas refusadas.
Suenter questas mesiras generalas discutescha il Cussegl naziunal uss sur da las mesiras economicas concretas.
