Tenor las indicaziuns las pli actualas vai per cugliunarias fatgas cun tests da corona en la summa dad almain 1,8 milliuns francs. L'Uffizi federal per sanadad (BAG) ha gia tramess intginas disposiziuns davart quints betg giustifitgads. Plinavant hajan ins instradà pass giuridics. Ulteriurs tals pass possia er dar anc pli tard.
Gia l'entschatta mars era vegnì enconuschent che la Confederaziun vul agir cunter quints fauss suenter tests da Covid-19. I sa tractia da quints che sajan vegnids tramess nungiustifitgadamain.
Centers da test han quintà dubel
Durant la pandemia avevan centers da test per part quintà fauss u quintà dubel ils custs. La controlla da finanzas ha crititgà il settember la Confederaziun. Quella haja fatg memia pauc cunter il maldiever. Il 2020 ed il 2021 ha la Confederaziun finanzià custs da tests cun 2,7 milliardas francs. El ha surpiglià ils custs ch'èn vegnids quintads giu entras la cassa da malsauns.
Il BAG vul uss furmar in team che duai evaluar cas da dubi e pretender enavos daners ils daners pajads. Tranter auter ha il BAG fatg analisas e controllas d'in tagl traversal da tut ils furniturs da prestaziun. Là haja lura dà tschertas singularitads. Da quai è lura sa resultada ina controlla pli fundada da quest dumber «fitg pitschen» da furniturs. Quels hajan tschentà quints surproporziunals per discurs da pazients fitg detagliads.
Ils ultims onns han medias fatg public cas da tests da corona e quints tschentads fauss. Uschia hajan millis persunas segiradas raquintà da tests da corona cumparids sin lur quints, ch'els n'hajan dentant mai fatg.