Ils chantuns duain a partir da l'emprim da schaner 2023 surpigliar sezs ils custs dals tests da corona. Ed a partir da l'avrigl 2023 duain ils chantuns surpigliar l'entira responsabladad per il sistem da tests. Quai ha il Cussegl federal decis - il parlament vegn a decider en chaussa.
La raschun: Cun turnar en la «situaziun normala» tenor la lescha d'epidemias, stoppian ils chantuns surpigliar la responsabladad principala per dar dumogn a la pandemia da Covid-19.
Chantuns n'èn betg d'accord
Gia tar la consultaziun hai da critica dals chantuns, d'associaziuns e da partidas per la proposta dal Cussegl federal da prolungar la lescha da Covid-19. Cunzunt ha disturbà l'idea ch'ils chantuns duain surpigliar il custs da testar sin corona a partir da l'onn 2023. Bain laschass il Cussegl federal decider sezs ils chantuns tge tests ch'els vulan pajar. La Confederaziun vul dentant obligar ils chantuns da porscher avunda pussaivladads da testar.
Il Cussegl federal tegn uss dentant da principi vi da sia proposta, malgrà la critica. El ha sulet prolungà per trais mais la data, cura ch'ils chantuns duain surpigliar la responsabladad per ils tests.
Entira lescha cumpigliar blirs puncts
Sper promover il svilup da medicaments cunter il coronavirus duai era la pussaivladad d'edir certificats da corona, per exempel per viadis en l'exteriur, vegnir prolungada enfin il zercladur 2024. Betg prolungar vul il Cussegl federal dentant la basa legala per ils sustegns finanzials per l'economia ed ils cas da direzza.