La Svizra haja avunda instruments per regular la convivenza tranter urs ed uman. A questa conclusiun vegn il Cussegl federal che ha deliberà in rapport correspundent. Dentant ves'ins potenzial tar la prevenziun.
Pli bain ch’ins dismetta ils ruments e meglra che la protecziun dals avieulers e dals animals da niz è – pli pitschen è il ristg ch’in urs daventa problematic. L’Uffizi federal d’ambient examinescha perquai il concept da prevenziun actual, ed amplifitgescha tut tenor quel.
Per il Cussegl federal tanschan quests pass il mument. Che ursas arrivian en Svizra e ch’i sa furmia ina populaziun – cun quai saja da quintar il pli baud en 10 fin 20 onns, manegia la regenza.
Dapi passa 15 onns puspè urs en Svizra
Suenter 100 onns è arrivà l’onn 2005 in urs da l'Italia en Svizra. Dapi lura han ins chattà bunamain mintg’onn fastizs dad urs. Ed ins va da quai anora che var 20 urs han visità la Svizra dapi lura. Quai sulettamain urs mastgel. Dus han las autoritads laschà sajettar, il 2008 ed il 2013 – per proteger la populaziun.