Las emprimas dumondas èn stadas las medemas per mintga parlamentari:
- Tge è stà Voss meglier mument politic da l'onn passà?
- Tge è stà Voss mender mument politic da l'onn passà?
Silsuenter ha mintgin e mintgina respundì ulteriuras dumondas che pertutgan lur vita politica.
Roman Hug
L'entschatta fa il pli nov parlamentari grischun: Roman Hug da la Partida Populara Svizra è dapi in onn a Berna. Ad el ha fatg il pli grond plaschair la lavur en cumissiuns. Betg plaschì ha ad el ch'i na vegnia betg sa tegnì vi da tschertas reglas da la collavuraziun.
Jon Pult
Il politicher da la Partida socialdemocratica politisescha dapi tschintg onns en il Cussegl naziunal ed è stà avant in onn en la cursa per daventar cusseglier federal. Quella ha'l però pers encunter Beat Jans. Il pli bel mument politic per el è stà, cura ch'il pievel svizzer – ed il Grischun – han ditg Gea a la 13avla renta da l'AVS. Ch'il Cussegl naziunal ha dacurt decis da stritgar 250 milliuns francs per la collavuraziun internaziunala è stà il punct il pli bass da l'onn.
Anna Giacometti
Era per la parlamentara da la Bregaglia va l'emprim onn da la segunda legislatura a fin. Ella ha dastgà presidiar la cumissiun da planisaziun da la legislatura. Quai para d'esser in tema sitg, ma la collavuraziun cun 25 parlamentaris e parlamentarias, l'administraziun e la presidenta da la Confederaziun haja fatg plaschair. Trumpada è ella stada cura, che la revisiun dal provediment professiunal ha fatg naufragi a l'urna.
En spezial ha però in'ulteriur tema fatschentà la parlamentaria Bregagliotta: L'accusa pervi da mazzament per negligientscha che marscha cunter ella sco anteriura presidenta da Bondo, e quatter ulteriuras persunas. Quai en il rom dad investigaziuns, sche la mort dad otg viandantas e viandants èn morts en la val Bondasca tar la bova dal 2017. Sclerì vegn, sche tuts hajan fatg tut il pussaivel per impedir quai.
Martin Candinas
Il politicher dal Center è dapi 13 onns a Berna ed ha gì l'emprim onn sco deputà ordinari, suenter esser stà president dal Cussegl naziunal e pli aut Svizzer. En ina rusna na saja el betg crudà, cunquai ch'el haja surpiglià novas incumbensas. Il pli grond plaschair per il Sursilvan è stà che la lescha per segundas abitaziuns è vegnida messa en vigur quest onn. Frustrond saja adina, sch'ins perdia votaziuns, sco quella da l'AVS u da la cassa da pensiun.
Magdalena Martullo
Per la scheffa da la «Ems Chemie» èn tut las convenziuns da commerzi liber ch'èn suenter enfin 10 onns vegnidas terminadas il high-light da l'onn. Per ella vegn il punct il pli bass pir anc. Ils 20 da december vegn il Cussegl federal pli probabel a finir las contractivas davart il contract general cun l'Uniun europeica. Per la politicra da la Partida Populara Svizra ch'è dapi 9 onns a Berna in sbagl.
