Las partidas svizras fan bilantscha. La PPS discurra d'ina disditga. La raschun saja tranter auter che la Russia na saja betg stada envidada e che pajais sco l'India, l'Africa dal Sid e la Brasilia n'hajan betg suttascrit la decleraziun finala.
La PPS è entant la suletta partida che tira ina bilantscha negativa. Tschellas partida discurran d'in success e laudan la presidenta da la Confederaziun Viola Amherd ed il minister da l'exteriur Ignazio Cassis.
Dumengia è la conferenza da pasch sin il Bürgenstock ida a fin cun ina decleraziun finala. Quella han 84 da radund 100 delegaziuns suttascrit. Nagin sustegn n'hai dà dals stadis Brics sco l'India, la Brasilia e l'Africa dal Sid. Quests stadis èn era sulettamain stads preschents cun represchentants main impurtants.
Betg sa cunvegnidas èn las delegaziuns davart la dumonda, cura e co che la Russia vegnia cumpigliada en ils discurs. Sco la presidenta da la Confederaziun Viola Amherd ha ditg en ses pled final, saja entant gartegià da sa cunvegnir a visiuns communablas. Concret pretenda la decleraziun tranter auter, che l'Ucraina survegn puspè access a ses ports. En pli pretenda la decleraziun in barat da praschuniers, e ch'uffants deportads en la Russia vegnian manads enavos en l'Ucraina.
Il president da l'Ucraina Wolodimir Selenski ha ditg en ses pled a la fin da la conferenza, ch'i dettia gia discurs cun plirs pajais per ina segunda conferenza da pasch. Avant ina tala stoppian ins però elavurar ulteriurs plans d'acziun. E Selenski ha appellà a tuts da cuntinuar cun las stentas.
Il dispositiv da segirtad sin il Bürgenstock è entant schlià. Suenter che tut las participantas ed ils participants protegids dal dretg internaziunal han bandunà il lieu, na dettia naginas controllas pli. Glieud che viva là na basegnan nagins badges. La bloccada dal spazi aviatic vala anc enfin mesanotg.
Polizia tira fazit positiv davart concept da segirtad
Durant la conferenza da pasch per l'Ucraina sin il Bürgenstock haja dà mo paucs disturbis, sco la polizia chantunala da la Sutsilvania ha scrit. Sco spetgà haja cunzunt dà attatgas da cyber en furma da surchargia, ma senza grondas consequenzas. Tar l'access a zonas da segirezza hajan singulas persunas e vehichels suspectus stuì vegnir renviads.
Cunzunt stadis dal vest vegnan
Ils giasts impurtants dasper il president ucranais Wolodimir Selenski èn stadas la vicepresidenta americana Kamala Harris, il chancelier tudestg Olaf Scholz ed il president franzos Emmanuel Macron.
Gist uschè impurtant è dentant, tge ch'i ha mancà u ch'ha tramettà mo represchentants main impurtants sin il Bürgenstock. La China boicottescha la conferenza, la Russia n'è betg envidada – e sulet represchentants diplomatics tramettan la Brasilia, l'Indonesia, l'Israel, las Filippinas, l'Africa dal Sid ed ils Emirats Arabs Unids.
Avant la conferenza èn Viola Amherd ed il minister da l'exteriur Ignazio Cassis s'annunziads via social media. L'inscunter saja in engaschament da la cuminanza internaziunala per pasch en l'Ucraina. I vegnia dentant a duvrar blers ulteriurs pass.
Avant la conferenza
Paucs dis avant la conferenza è la vita sin il Bürgenstock anc stada tut normala. La glieud giaja a spass, ils uffants a scola, i vegnia lavurà.
Per la populaziun da la regiun enturn il Bürgenstock è la situaziun natiralmain nunusitada. Tenor la cussegliera guvernativa dal chantun Sutsilvania, Karin Kayser-Frutschi, sajan ils sentiments da la populaziun bain maschadads. D'ina vart sajan differents abitants sceptics, da tschella vart è però ina gronda part d'els era plain mirveglias.
Optimissem e sceptica da vart dals parlamentaris
L’inscunter suprem sin il Bürgenstock ha er procurà per discussiuns en il Parlament federal. Per il cusseglier dal chantun grischun, Stefan Engler, èsi ina buna chaschun per sclerir sut tge cundiziuns ch’i saja pussaivel da cuntanscher ina pasch en l’Ucraina. Pli sceptica è la cussegliera naziunala grischuna, Magdalena Martullo, da la PPS. Che l’inscunter vegnia propi a fullar via per ina pasch na crai ella betg.
Cundiziun fiss stada tenor ella da ramassar enturn la maisa da negoziaziun tut ils partenaris relevants, pia era la Russia. Ella crititgescha perquai er il Cussegl federal ch'haja cun ses agir en il conflict sacrifitgà la neutralitad da la Svizra.
Ina missiun difficila
I na dettia nagut che saja pli intschert ch'ina conferenza da pasch sche omaduas partidas sajan anc en cumbat, ha ditg il minister da l'exteriur svizzer Ignazio Cassis a chaschun d'ina conferenza da medias a Berna.
Igl è sco ascender in piz: ina missiun difficila. I dettia da tschella vart be l'alternativa da far nagut. E quai n'haja la Svizra betg vulì.
La finamira d'ina tala conferenza saja adina che tut ils participants approveschian la decleraziun finala. Ma, sche quai succedia dependia dal decurs da la conferenza. Impurtant saja però era che la Svizra possia annunziar suenter l'inscunter nua ch'ina proxima conferenza da pasch vegnia ad avair lieu. I dettia pajais ch'hajan demussà interess.
Pers l'Ucraina cun envidar la Russia
Sin la dumonda d'in schurnalist russ, pertge che la Svizra n'haja betg simplamain envidà la Russia ed uschia surdà la decisiun al Kreml, ha Cassis respundì, ch'i saja stà la responsabladad da la Svizra d'envidar la Russia u betg. I saja stà ina decisiun cun risicos. La Svizra sco pajais ospitant avess bain pers l'Ucraina cun envidar la Russia a la conferenza da pasch sin il Bürgenstock.
Ultra da quai haja il minister da l'exteriur russ, Sergei Lawrow, gia il schaner mussà pauc interess e ditg, che la conferenza da pasch saja in'occurrenza pro Ucraina. En quest dilemma haja la Svizra decis da betg envidar la Russia. Els hajan bain tschertgà vias creativas, di Cassis. Fin ussa na saja però betg gartegià da prender a bord tuttas duas partidas.
Fin uss èn 90 stadis s’annunziads per la conferenza da pasch per l’Ucraina sin il Bürgenstock. Quai saja in indizi che l’iniziativa da la Svizra vegnia appreziada, ha la presidenta da la Confederaziun Viola Amherd ditg a las medias a Berna. La finamira da l’inscunter saja d’elavurar in urari per il process da pasch futur e da chattar ina pussaivladad d'integrar las duas partidas da conflict.
Tenor la ministra da defensiun èn las mesiras da protecziun sin buna via. Il Bürgenstock en il chantun Sutsilvania saja in lieu ideal per garantir la segirezza. La Svizra sa preparia sin tut ils ristgs pussaivels, agiunta Viola Amherd. Il Cussegl federal aveva approvà avant intginas emnas che 4'000 schuldada da l'armada svizra duai gidar da segirar l'eveniment d'aut rang. Las truppas sajan gia en acziun e scoladas per talas situaziuns, è vegnì agiuntà or da las ritschas da l'armada. Ins emprovia da restrenscher la populaziun al lieu uschè pauc sco pussaivel.
La conferenza da pasch ha lieu durant la fin d'emna dals 15 e 16 da zercladur.
