Daniel Koch dal BAG e Pascal Strupler, directur dal BAG, han infurmà davart il cas da Corona en il Tessin e co vinavant:
- In um da 70 onns che viva en il Tessin è s'infectà cun il virus durant ina conferenza ch'el ha visità ils 15 da favrer a Milaun.
- Ils 17 da favrer ha el mussà emprims sintoms ed è stà en contact cun ses confamigliars. Els han tgirà el ed el è vegnì surveglià d'in medi.
- Ier è l'um vegnì testà ed oz è vegnì confermà il resultat positiv. El sa chatta il mument en in bun stadi da sanadad ed è isolà en l'ospital.
- La famiglia stoppia uss er star 14 dis en quarantina, per far la segira ch'els na sajan betg s'infectads.
- I dat in ristg moderà per la populaziun en general. Il ristg crescha dentant er cun il dumber da cas mundial che creschan anc adina.
- Il cas confermà na mida nagut vid la valitaziun da la situaziun, ha declerà il directur dal BAG Pascal Strupler. Las mesiras na vegnan betg rinforzadas. I resta tar las mesiras inditgadas ier.
- La Svizra sa chattia anc en ina «situaziun normala». Uschespert ch'ins perdia la survista da las chadainas, co las persunas èn s'infectadas, sa midia quai tenor la lescha d'epidemia, lura ha il Cussegl federal da decider co enavant.
- Per viagiar en il nord da l'Italia na datti naginas recumandaziuns. Il BAG cusseglia dentant da s'infurmar local, damai ch'i dettia citads che sajan serradas giu cumplet.
Annunzià ier mesiras al cunfin
Malgrà la derasaziun dal virus en l'Italia dal Nord han las autoritads svizras e tessinaisas fin uss prendì mesiras pli levas. La Svizra saja pronta per reagir, aveva declerà ier il cusseglier federal Alain Berset. Cun il dumber da cas da Corona ch'èn s'augmentads svelt durant la fin d'emna en l'Italia, è er creschì il ristg en Svizra. Il Cussegl federal observia la situaziun.
Qua en il video chattais intginas mesiras che in e scadina po prender per sa proteger:
Grischun n'ha anc naginas mesiras
Ier aveva il Grischun decidì da prender naginas mesiras pervi dal virus da Corona. Quai era vegnì decidì ensemen cun experts, suenter ch'els avevan discutà la situaziun actuala.
Emprims cas da suspect en Austria
Adina dapli regiuns da l'Italia annunzian cas dal virus da Corona. A Palermo en la Sicilia datti in emprim cas, i sa tracta d'ina dunna da la Lumbardia. Vitiers ha il Tirol dal Sid annunzia l'emprim cas probabel, in um ch'era stà en Lumbardia. En l'Italia èn gia mortas 11 persunas vi dal virus da Corona. Plinavant datti fin uss 280 persunas ch'èn s'infectadas.
Ils cunfins restan averts
Malgrà la derasaziun dal virus en l’Italia duain ils cunfins cun ils pajais vischins restar averts. Quai ha communitgà il minister da l’intern talian Roberto Speranza suenter in inscunter cun ses collegas d’uffizi dals pajas vischins. Era il cusseglier federal Alain Berset è stà da la partida. Serrar ils cunfins fiss in sbagl e exagerà, hai gì num.
Entant ha il ministeri chinais dals fatgs exteriurs communitgà che la regenza a Peking lavuria fitg stretg cun la Corea dal Sid e cun il Giapun. Quai per augmentar las mesiras cuminaivlas en il cumbat cunter il virus.
RTR novitads 16:00