Il settember passà è stà pli chaud ch'in mais da stad ordinari. En media èsi stà 14,3 grads chaud.
Quai è in record dapi ch'ins ha mesirà las temperaturas en Svizra (1864). Tar la gronda part da las staziuns da mesirar hai dà records da temperaturas per il settember (da 97 han mo 13 betg mesirà in record).
Per l'october hai gia dà 20 records
Fin a las 17:00 il glindesdi han plinavant 20 staziuns mesirà temperaturas da record per l'october. A Buffalora èsi stà 21,3 grads chaud, in grad pli chaud ch'il record vegl. Quel è dal reminent pir stà da la dumengia. Er a Samedan (21,1 grads) e sin il Piz Corvatsch (8,1 grads) èsi anc mai stà uschè chaud l'october.
Sper il stgaudament dal clima ha cunzunt l'aura e pliras fasas da pressiun autas chaschunà questa situaziun. Igl ha er dà bler sulegl e plirs records dad uras da sulegl per il settember, per exempel a Son Gagl. Ed er en l'october cuntinuescha cun temperaturas miaivlas, ed igl ha gia dà plirs records da temperaturas per il november.
