Malgrà canortas d’uffants subvenziunadas n’han mammas per gronda part betg augmentà lur pensum da lavur. Quai demussia in studi dal professer d’economia turitgais Josef Zweimüller, sco la «NZZ am Sonntag» rapporta. Zweimüller e ses team hajan per quest intent analisà tschients da vischnancas en Svizra ed en l’Austria. La raschun da l’effect mancant sajan las normas socialas – pia la repartiziun da las rollas dals geniturs – che sajan ferm francadas en Svizra ed anc adina fitg tradiziunala.
Discriminaziun da la maternitad
Canortas d'uffants subvenziunadas na resolvian tenor Zweimüller er betg l'uschenumnà «Child Penalty», u per rumantsch: la discriminaziun da la maternitad. En Svizra saja quella pli gronda ch'en l'exteriur. 10 onns suenter la naschientscha da lur emprim uffant gudognan dunnas svizras en media be 60% da la paja ch'ellas avessan senza uffants.
Il mars decida il Cussegl naziunal davart in augment da las subvenziuns per canortas d'uffants. Concret va quai per in pachet da 770 milliuns francs.
