Il plaz d'Alexander amez Cuira, u sco ch'el vegn numnà il di da chauma, il plaz d'Alexandra, è puspè violet. Umens e dunnas èn sin via per ils dretgs da las dunnas. La tschintgavla giada che la chauma da dunnas ha lieu a Cuira. Tranter las demonstrantas ed ils demonstrants è era Joanna Bachmann, quai è ina part dal collectiv feministic.
Ella è oz sin via perquai ch'ella è vilada – vilada sin la societad, vilada sin l'inegualitad e vilada sin la paja ineguala. Ensemen cun tut las autras e tut ils auters che cumbattan per quai, ha ella scrit placats, dissegnà sin t-shirts e repartì plachettas.
Cumbatter per ils dretgs da las dunnas na saja nagut da nov, di ella. Dapi decennis giaja la glieud sin via a demonstrar.
La chauma da dunnas ha istoricamain cuntanschì fitg bler.
Questas finamiras na dovran betg mo solidaritad dals umens, ma era da las dunnas tranter ellas, di ella. Ma gist quai ha apparentamain mancà ad in'autra dunna.
La cussegliera Sandra Maissen ha menziunà quai tranter auter sco motiv, pertge ch'ella n'è betg vegnida elegida anc ina giada en il cussegl da la citad. La commembra da la JUSO Joanna Buchmann ha in autra opiniun.
«Jau pens ch'ins stoppia tscherner quella persuna che porta propi ina midada», di Joanna Bachmann. Ella n'è er betg da l'avis, ch'ins vess stuì eleger Sandra Maissen, mo perquai ch'ella è ina dunna.
La solidaritad tranter las dunnas saja fitg gronda, di ella. Quai sent'ins era vid la chauma da dunnas.
Questas structuras ans suppriman tuts e nus tuts patin da quai.
Per mussar questa solidaritad van oz umens e dunnas sin via per demonstrar. Ellas na vulan dentant betg mo midar il futur, ma er il focus da l'istorgia. «I dovra novas istorgias da eroxas», di Joanna Bachmann. «Nus stuessan undrar mammas ch'educheschan sulettas empè dad umens morts cun spadas.»
Tut en tut pon ins dir, che bler è sa midà, ma ch'i dat anc bler potenzial. Il collectiv feministic vegn en mintga cas a cuntinuar.
