Giuliana Collenberg
La dunna da 72 onns è creschida si a Lumbrein en Val Lumnezia. Gia da pitschna ha ella udì che dunnas na stoppian betg far in emprendissadi, ellas maridian gea uschè u uschia. E maridar muntava en quest cass era d'esser mamma e dunna da chasa.
Malgrà ch'ella n'ha betg fatg in emprendissadi ha Giuliana Collenberg lavurà mordio. L'enviern ha ella servì en hotels e la stad ha ella gidà ses frar sin il bain puril. Cura ch'ella è vegnida mamma, è sia rolla dentant sa midada:
Lura ha jau stuì... na betg stuì... mabain dastgà star a chasa e trair si mes quatter uffants.
Che bleras dunnas veglian ozendi omadus – star a chasa e lavurar – chapescha ella. Tuttina per tge che la famiglia sa decidia, l'impurtant saja ch'ils uffants na vegnian betg a la curta.
Sofia Vinzens
15 onns pli veglia che Giuliana Collenberg è Sofia Vinzens da Luven, medemamain en Val Lumnezia. Ella è mamma da trais uffants, stada dunna da chasa ed ha lavurà sco vendidra. Tranter auter ha ella manà la filiala dal Coop en ses vitg nativ. Sch'ella avess dentant dastgà eleger, fiss sia professiun stada in'autra:
Jau avess gugent fatg scolasta da lavur. Dentant mes frars pli vegls han gia fatg emprendissadis, e perquai n'èsi betg stà pussaivel d'ir a Cuira a far scolaziun.
Il plaschair da far chaussas manualas è dentant restà. Pli baud haja ella fatg bler chaltschiel, cun ils onns ha ella lura cumenzà a malegiar. Fluras e cuntradas èn fin ussa ses sujet preferì. Dentant mo rosas n'è sia vita, sumegliant a la vita d'autras dunnas da quest temp, betg stada. Ses um è stà blers onns president communal, e perquai era bler ord chasa. Savens saja ella stada responsabla persula per lur uffants, di Sofia Vinzens. Oz po ella dentant guardar enavos sin passa 65 onns lètg ed ina vita cumplaina. Era sch'ella n'ha betg gì tantas libertads e pussaivladads sco bleras dunnas d’ozendi.
Sofia Capaul
Creschida si a Rueun è in'autra Sofia, Sofia Capaul. Tuttina sco ses numalin ha er ella emprendì da vendidra. Sper esser mamma da trais uffants e dunna da chasa fascheva ella il biro da la fatschenta da pictur da ses um. E mintgatant, sch'i n'avevan betg avunda lavurers, gieva ella er a dar colur fatschadas.
Sco dunna haja ella savens gì da guardar per ils auters, di Sofia Capaul. Per si’atgna famiglia, per ses geniturs, e per ses sir e sia sira. I saja dentant stà in bel temp en buna cuminanza. Insumma haja ella adina gì buna glieud enturn ella, di la dunna che ha ussa 88 onns.
Rueun saja da lez temp stà in vitg activ, ella gieva a cantar e dar jass ed ils uffants termagliavan cun ils uffants dals vischins. Malgrà ch'ella ha vivì e lavurà bler per ils auters, a la curta na saja ella perquai betg vegnida. Sin il pli quai che pertutga la professiun: gugent avess Sofia Capaul numnadamain anc lavurà sco vendidra intginas uras per emna. Cun tut la lavur ch'ella aveva da far, na saja quai dentant betg stà pussaivel.
E tge pensan ellas dal feminissem d'ozendi?
I saja bel e bun che las dunnas d’ozendi hajan dapli pussaivladads che quai ch'ellas han gì, manegian las trais dunnas ch'èn tranter 72 e 88 onns veglias. Sche omadus geniturs veglian ir a lavurar, lura stoppian ins chattar ina soluziun che cuntentia tuts. Ils uffants na dastgian betg patir surlonder sch'ils geniturs sajan omadus davent.
Natiralmain possia er il bab restar a chasa a guardar dals uffants, manegia Giuliana Collenberg. Dentant profund en il cor craja ella che quai saja l'incumbensa principala da la mamma. Per tuttas trais dunnas e mammas èn e restan ils uffants la pli custaivla chaussa da la vita.