La Chadaina da Fortuna haja fin uss rimnà 135 milliuns francs per l’Ucraina – la segund auta summa en l’istorgia da l’organisaziun. La Chadaina da Fortuna impundia bunamain 90% da las donaziuns directamain en il pajais. Sonda èsi dus onns dapi che la Russia ha attatgà l’Ucraina.
Dapi che la Russia ha invadì l’Ucraina ha la guerra donnegià enormamain la vita quotidiana da las Ucranaisas e dals Ucranais en tut ils secturs. Ils blers bumbardaments han chaschunà ina destrucziun massiva da l’infrastructura decisiva – ed han periclità l’access ad electricitad, stgaudament, aua, sanadad e furmaziun. La Chadaina da Fortuna ha impundì ils dus onns passads passa 80 milliuns francs donaziuns en 109 projects per l'agid umanitar.
Grazia a la solidaritad da la populaziun svizra avain nus pudì prestar grond agid en las regiuns pertutgadas il pli fitg. Per pudair garantir a lunga vista noss agid umanitar essan nus dentant dependents d’ulteriur sustegn.
Sustegn per las persunas las pli flaivlas
Dapi l’entschatta da la guerra en l’Ucraina ha la Chadaina da Fortuna adattà cuntinuadamain sia strategia als basegns dals pertutgads da la guerra. Entant che l'agid è vegnì extendì ils emprims mais sin pajais vischins sco la Moldavia, la Pologna u la Rumenia (36 projects en l'autezza da 6,8 milliuns francs), è ella sa concentrada pli tard puspè sin l'Ucraina da l'Ost ch'è pertutgada directamain dals cumbats sco er sin territoris, nua che bleras persunas èn fugidas. La Chadaina da Fortuna ha impundì bunamain 90% da tut las donaziuns directamain en l'Ucraina e sa concentrescha sin persunas cun basegns spezials. Latiers tutgan tranter auter uffants, dunnas en speranza e persunas pli veglias e persunas cun impediments.
