La butia da second hand da Caritas a Cuira cuntegna sper in'immensa tscherna da vestgadira ed autras chaussas era in café. Il mainafatschenta Alessandro Della Vedova declera che Caritas a Cuira retiria la vestgadira savens da glieud privata, ma era da firmas. Il gudogn da la vendita dovria Caritas per finanziar la butia e per agens projects, per exempel per novs indrizs per il center da cuser da Caritas.
Las donaziuns s'augmentian tendenzialmain, dentant era la dumonda. La gronda part da la clientella vegnia or da motivs da povradad. Il mainafatschenta accentuescha che vestgadira gioghia era ina rolla tar il cumbat encunter povradad.
Cunquai che la cumparsa è impurtanta en nossa societad, gioga era la vestgadira ina gronda rolla tar l'inclusiun.
Adina dapli glieud pensiunada e fugitivs e fugitivas da l'Ucraina visitian la butia. Che la povradad s'augmentia, tranter auter pervia da l'inflaziun, sentia el per exempel vi da la vendita da las chartas da Kulturlegi, ch'i dettia dapi circa 15-20 onns. Quella porscha diversas reducziuns, betg mo en la sparta da cultura. Fin la fin da l'onn 2020 sajan 1'350 cartas vegnidas approvadas, fin la fin da l'onn 2022 gia 2'600 plus 500 ulteriuras per Ucranais ed Ucranaisas.
Il motiv per l'augment da las cartas è ch'ella dat access al martgà da Caritas, nua ch'ins po cumprar nutriment per in pretsch reducì.
Sch'insatgi survegn ina carta dependia tranter auter da la paja e da la grondezza d'ina famiglia. Per exempel survegn ina famiglia da quatter persunas cun ina paja da pli pauc che 4'500 francs ina carta. Era en la butia da second hand da Caritas survegnan ins cun la carta ina reducziun da pretsch.
Impressiuns
-
Bild 1 von 2Legenda: RTR
-
Bild 2 von 2Legenda: RTR
Ils pretschs en la butia èn mintgamai tuttina per mintga toc: Per exempel custia mintga chautscha 8 francs, tuttina sch'ella era oriundamain da marca u d'in discounter. Quai per che tuts e tuttas hajan il medem access. E tuttina, era la clientella che cumpra or da motivs da persistenza s'augmentia, quai che fa plaschair al mainafatschenta, perquai ch'igl impedeschia ina «ghettoisaziun».
Per il futur giavischa Alessandro Della Vedova che la politica prendia mesiras encunter la povradad che crescha, quai ch'è visibel mintga di en la butia da second hand da Caritas.