Dapli entradas datti pervi da l'adattaziun da la taglia sin la plivalur e dapli entradas tar la taglia sin il gudogn. Il Cussegl federal quinta cun in augment da 2,1%, sin totalmain 83 milliardas francs, cumpareglià cun il budget da l'onn 2023. Cuntrari al preventiv da 2023 n'è betg budgetà ina distribuziun supplementara da la Banca naziunala svizra. Per l'onn 2023 è calculà 1,3 milliardas francs.
Las extradas creschan per 4,1%. Quai pervi da la refurma da l'AVS ed ina subvenziun per las Viafiers federalas. Vitiers vegnan pli auts tschains da debits e l'auzament d'expensas per l'armada. Uschia che la Confederaziun dat ora 3,5 milliardas francs dapli ch'en quest onn, en tut 89,7 milliardas francs. I vegn quintà cun 1,2 milliardas francs per ils chantuns pervi dal status S per fugitivs or da l'Ucraina, ina subvenziun per las Viafiers federalas dad 1,2 milliardas e 4 milliardas per la branscha d'energia en cas urgent. I na vegn dentant betg quintà che quests daners vegnan duvrads.
Ils proxims onns restan difficils
Era preschentà ha il Cussegl federal il plan da finanzas per ils onns 2025 fin a 2027. I vegn quintà cun deficits structurals da 0,3 fin a 1,2 milliardas francs. E quai malgrà al pachet da mesiras per l'onn 2025 ch'il Cussegl federal trametta en consultaziun. Tranter auter duai la contribuziun da la Confederaziun a l'Assicuranza cunter la dischoccupaziun vegnir reducida per 250 milliuns francs ils onns 2025 fin a 2029. Plinavant vegn la cumpart dals chantuns a la taglia federala directa sbassada per fin ad 1,1 puncts procentuals. Per il Cussegl federal èsi dentant cler, ch'i dovra pli probabel anc ulteriuras mesiras. El vegn ad examinar co duvrar las entradas supplementaras da la taglia minimala da l'OECD, a partir dal 2026.