Levar baud, ir da tutt'aura ordadora e sulettamain lavurar in pèr uras – quai èn parts da la lavur ch'in portagasettas ha da far. E per quels motivs n’èsi era betg uschè simpel da chattar lavureras e lavurers, di Jan Hofer. El è mainafatschenta da la Somedia Distribution SA. Lur cumpetenza da coc è il distribuir las gasettas gia baud la damaun.
Il bler èsi persunas giuvnas – students u da quels che tschertgan lavur sulettamain per in temp. Nus avain dentant era lavurers e lavureras che fan quella lavur gia dapi blers onns.
Davent da settember cun posta
Tge che capita, sch'els na chattan nagins portagasettas, han ils abunents e las abunentas da Sedrun da curt sentì. Davent da l'entschatta da settember na survegnan els las gasettas betg pli la damaun marvegl, mabain pir cun la posta. Intgins dad els han perquai midà sin la varianta electronica. Pia leger las gasettas sin il telefonin, computer u tablet.
Tuttina sperescha Jan Hofer da pudair cuntinuar cun la distribuziun a bun'ura. Era damai che la clientella stima tenor el quella purschida.
