Ils blers enconuschan il musicist engiadinais Domenic Janett probablamain dals «Fränzlis da Tschlin» nua ch'el suna musica populara cun sia clarinetta – accumpagnà tranter auter da la violina da sia figlia Anna-Staschia Janett. Ses figl – Gian Andri Janett – ha mintgatant er accumpagnà ils Fränzlis cun ses cello. Quest cello resta ozendi dentant plitost en la chasa paterna – durant ch'il student da sport viva a Berna.
E tuttina fan bab e figl ensemen musica – simplamain musica per far party. Gian Andri Janett ha gia avant var sis onns gì questa idea: El sco DJ e ses bab cun il saxofon. Igl ha anc pretendì in zic lavur da persvasiun – ma durant la chatscha sin la chamona ha el lura pudì persvader ses bab che dat uschiglio concerts plitost «patgifics».
Ed uschia han els ussa gia dà plirs concerts ensemen – per il solit durant la pli gronda party da students a Berna – il «Superbowl» en il «Bierhübeli», nua che passa 1'000 students e studentas vegnan ensemen per far festa. Ed insatge è crudà si fermamain durant quels curts concerts à trais fin quatter chanzuns da Domenic Janett: L'um da 74 onns e ses saxofon plaschan enorm bain als giuvens e las giuvnas dad enturn 20 onns. Ed era Domenic Janett sto conceder ch'el ha giudì quella «lavina» d'applaus ed acclamaziun che vegn da quest auditori giuven ed euforic. Ma era per Gian Andri Janett sajan quellas sairas cun ses bab ils highlights da l'onn.
Or da l'archiv:
