Biennala da teater Locarno - Cun participaziun rumantscha da Vuorz e Ftan

Mintga dus onns hai num per acturas ed acturs dal teater popular: Scena libra! En il rom dad ina biennala han els l’occasiun da preschentar lur tocs e lur teaters ad in public naziunal. Societads da teater da l’entira Svizra fan part a la biennala dal teater popular ch’è questa giada a Locarno. En il Teatro di Locarno ed en il Teatro Paravento preschentan els lur ovras. 

Uniun da teater Vuorz cun «Il tribunal dal luf»

Premiera ha gì il toc or da la plima da l’autur e reschissur Andreas Cadonau tar la festa da guaud «uaul pign» a Vuorz l’entschatta avust. En ses toc ha Andreas Cadonau prendì si in tema fitg actual. In tema che n'occupa betg be puras e chatschaders en Surselva, mabain er ina buna part da la populaziun ch’è confruntada cun il return dal luf en nossas regiuns. Il luf è daventà in tema omnipreschent, in tema che dat da pensar a blera glieud. Uschia ha Andreas Cadonau scrit in toc da teater sin la pel dal luf e metta quel davant in derschader e davant in tribunal. Ed il luf vegn alura era sentenzià.

Societad da teater Ftan cun «Fö e flomma»

Auter che l’Uniun da teater Vuorz che preschenta a la biennala in toc liber, preschenta la Societad da teater Ftan in toc cun il tema passiun. Quai ch'è il motto da questa biennala. L’autur Mario Pult ha scrit il teater «Be fö e flomma» nua che persunas raquintan da lur passiun e da lur fascinaziun. Ellas fan quai en passant a la staziun. Las persunas èn en lur agen mund ed era sch'i tschertgan il contact cun autras persunas a la staziun han quellas pauca encletga ina per l’autra. Mintga persuna è cun sia passiun en in agen mund. A la fin ves'ins che ina passiun collia tuttina tuttas e tuts e quai è la passiun per il teater.