La «Biennala» dal teater popular ha lieu quest atun a Locarno. En la citad a la riva dal Lago Maggiore ch’è surtut enconuschenta per ses festival dal film vegn giugà l'october teater. En il «Teatro di Locarno» ed en il «Teatro Paravento» sa preschentan gruppas da teater ed uniuns da las quatter regiuns linguisticas ad in public naziunal. Era duas gruppas da teater da la Rumantschia èn da la partida: l’Uniun da teater Vuorz e la Societad da teater Ftan.
Il tema è «Passiun» u ch'ins preschenta in toc liber
Locarno daventa il center dal teater popular. Sut la batgetta da la Societad da teater tessinaisa vegn organisà in inscunter dad amaturs da teater tut spezial. Premissa per far part è che ins gioga in teater da maximalmain mes’ura cun il tema «Passiun». U in toc liber dal tema che na dura betg dapli che 90 minutas. A las gruppas da teater ed a las uniuns statti liber co els vulan interpretar il tema «Passiun». Essenzial è dentant ch’ellas preschentan il teater en lur lingua materna.
Vuorz prenda l’occasiun da preschentar «Il tribunal dil luf» a Locarno
L’Uniun da teater Vuorz è gia vi da las emprovas per il teater «Il tribunal dil luf». Il teater è vegnì scrit da l'autur indigen Andreas Cadonau. El fa era gist sez la reschia dal toc, nua ch'il luf vegn mess davant dretgira. Andreas Cadonau ha scrit il teater en vista a la renaschientscha da la festa da guaud a Vuorz. Suenter in pausa da 20 onns datti numnadamain l’entschatta d'avust puspè ina festa en il «Uaul pign» a Vuorz. Quai è alura era gist l’occasiun da preschentar il teater anc ina giada tar la «Biennala» a Locarno.
Ftan preschenta il teater «Fö e flomma» da Mario Pult
La segunda societad da teater rumantscha che fa part a la Biennala ha laschà scriver il toc ch'els vegnan a preschentar da Mario Pult. Pult ha sez giugà teater, el ha gia fatg reschia e scrit scenettas. Per la Societad da teater Ftan ha el uss scrit il toc «Fö e flomma» che la societad vegn a preschentar durant la «Biennala» a Locarno. En il teater va quai per las pli differentas passiuns che radund 10 acturas ed acturs vegnan ad interpretar. Las emprovas cumenzan suenter las vacanzas da stad.
