La gievgia ha il president ucranais tegnì in pled avant il parlament. En quest pled ha Wolodimir Selenski appellà da tegnair ensemen. El ha er discurrì davart la situaziun en l'Ucraina, nua ch'i moran mintga di persunas pervia da la guerra che la Russia ha cumenzà envers l'Ucraina. Ch'in president d'in auter pajais tschantscha directamain avant il parlament schabegia da rar.
Tensiun en sala
Gia ina mes’ura avant ch'il president da l'Ucraina è vegnì a pled eran las tribunas da schurnalistas e schurnalists plainas.
La colliaziun da video cun l‘Ucraina è vegnida testada cun success e plaun a plaun s’è emplenida il parlament cun politicras e politichers. Unic la Partida populara svizra ha boicottà il pled dal president da l’Ucraina. Per la partida sa maschaida la Svizra en memia ferm cun laschar discurrer Selenski. Las autras partidas crititgeschan il deport dal PPS e na vesan nagin conflict per la neutralitad. I saja in act senza respect da betg vegnir en sala din represchentantas e represchentants da la Partida verda enfin tar la Partida liberaldemocratica.
La tensiun avant il pled era palpabla. Il president dal Cussegl naziunal, Martin Candinas, ha beneventà punct las 14:00 Wolodimir Selenski.
Stimà signur president, nus admirain la bravura, il curaschi e la perseveranza cun la quala las Ucranaisas ed ils Ucranais sa dostan cunter l'agressur russ.
Las valurs ch'Ucrainaisas ed Ucrainais defendan cun lur vita sajan er las valurs da la Svizra. Era sche la Svizra saja in pajais neutral na veglia noss pajais betg serrar ils egls da la sgarschur che la Russia porta a l’Ucraina.
Engrazià per la solidaritad
L’impurtanza da la solidaritad era er in punct ch'il president da l'Ucraina Wolodimir Selenski ha intunà en ses pled ch’el ha tegnì per ucranais. Parlamentarias e parlamentaris han pudì seguir quel cun traducziun. Selenski ha engrazià a la Svizra ch’ella haja decidì da surpigliar las sancziuns da l’Uniun europeica. Quai mussia la solidaritad. Las sancziuns cumpiglian tranter auter che la facultad da tschertas persunas da la Russia èn vegnidas schelentadas.
Nus stuain tegnair ensemen per defender nossas valurs.
Il president da l'Ucraina ha dentant era fatg attent sin las debattas actualas ch'han lieu en il parlament pervi da l'export d'armas. En discussiun è la dumonda da schluccar las cundiziuns da l'export per che armas svizras possian vegnir vendidas cun cundiziuns tras singuls terzs stadis en l'Ucraina.
Mesemna aveva il Cussegl naziunal decidì da vulair far liber la via per vender enavos a la Germania 25 panzers dal tip leopard. Quels duain remplazzar ils panzers che la Germania ha dà a l'Ucraina. Ma il Cussegl dals chantuns sto anc decider en chaussa.
Però tut en tut ha il president dal pajais che sa chatta dapi favrer da l'onn passà en guerra engrazià a la Svizra per l'agid. El ha fatg la proposta cha la Svizra duaia giugar ina rolla activa tar l’iniziativa globala per la pasch en l’Ucraina. Il parlament ha reagì cun grond applaus e standing ovations sin il pled da Selenski.
