Il Cussegl federal vul puspè negoziar cun l'Uniun europeica davart ina cunvegna. El ha decis ch'il Departament federal d'affars exteriurs duai elavurar in nov mandat da tractativas ed ins vul decider anc avant la fin da l'onn surda l'approvaziun da quel.
Ils resultats dals discurs da sondagi cun l'UE lubeschan ord vista dal Cussegl federal d'elavurar il sboz. Ins haja infurmà mesemna la cumissiun europeica davart questa decisiun, hai num en ina communicaziun. Ils davos in onn e mez ha il Cussegl federal gì emprims discurs cun l'Uniun europeica. Puncts dispitaivels èn stads tranter auter la circulaziun libra da persunas sco era reglas per la protecziun da las pajas.
Vuschs positivas da l'economia, critica da la Pro Svizra
Las partidas e las associaziuns economicas beneventan la decisiun dal Cussegl federal. La federaziun dals patruns ha communitgà ch'ins vegnia a chattar ina schliaziun tar il tema mesiras per proteger las pajas. L'organisaziun d'adversaris da l'UE, la Pro Svizra, renfatscha al Cussegl federal da betg vulair defender ils interess dal pajais.
UE è pronta da discutar
La cumissiun da l'UE ha communitgà mesemna saira ch'ella haja prendì enconuschientscha da l'urari dal Cussegl federal. L'UE vegnia da sia vart a sa stentar per in mandat da tractativas. Avant che las duas varts delibereschan lur mandats vegnan ellas anc a suttascriver ina decleranza communabla. En quella vegnan fixads ils resultats dals discurs da fin ussa.
