- L'Euroairport da Basilea Mulhouse è vegnì evacuà il venderdi pervia d'in alarm da bumbas. Quai suenter ch’il eroport è gia vegnì evacuà la gievgia ord il medem motiv. Omadus sajan stads in fauss-alarm.
- L'eroport che sa chatta sin terra franca è mo in da blers che han stuì vegnir serrads ad interim en Frantscha pervia da las smanatschas da bumbas.
L'Euroairport da Basilea-Mülhausen è danovamain vegnì evacuà il venderdi suentermezdi pervi d'in alarm da bumbas. Gia il di avant aveva in alarm sbaglià provocà ina interrupziun dal manaschi da l'eroport. Sin la pagina d'internet da la plazza aviatica hai gì num ch'il terminal stoppia vegnir evacuà per motivs da segirtad e ch'el saja actualmain serrà. Sco che las autoritads franzosas han annunzià sin X (pli baud Twitter) hai sa tractà d'in alarm da bumba.
Quai è capità la gievgia
Gievgia suentermezdi era l'eroport vegnì evacuà ed il manaschi da sgular e stà bloccà pliras uras – plirs sgols èn vegnids stritgads. Il manaschi vegnia ussa pass per pass puspè reprendì.
Dapi in'emna datti adina puspè alarms da bumbas tar eroports regiunals, che vegnan mintgamai serrads temporarmain. Pertutgads èn stads sper Basilea-Mulhouse era Montpellier, Nantes, Bordeaux e Lille.
Avant in'emna ha la Frantscha proclamà il pli aut stadi d'alarm da terrorissem suenter in'attatga mortala sin ina scola.
Gievgia en damaun avevan en tut 14 eroports da la Frantscha survegnì smanatschas d' attentats. Almain 11 eroports èn vegnids evacuads en vista a questas smanatschas da bumba, sco che l' agentura da novitad AFP ha annunzià. Pertutgadas eran oravant tut las plazzas aviaticas da Montpellier, Nantes, Bordeaux e Lille.
