L'uffizi federal da sanadad BAG duai preschentar ils contracts cun ils producents da vaccins, quai recumonda il protectur federal da datas en connex cun ina procedura da mediaziun. Sin fundament da la lescha da publicitad aveva in advocat dumandà access als contracts da furniziun da vaccins. Quai han gasettas da CH-Media rapportà. L'advocat ha tranter auter vulì savair quant che l'Uffizi federal da sanadad ha gia dà ora per ils vaccins e quant ch'è anc planisà da dar ora.
Fin ussa è il BAG sa dustà cun l'argument che la cumpra da vaccins na saja anc betg terminada. Ina publicaziun indebliss ils interess svizzers per contractivas actualas e vegnentas. Sin dumonda da l'agentura da novitads Keystone-SDA ha il BAG confirmà ch'el ha prendì enconuschientscha da la recumondaziun ed ins examinescha uss co vinavant.
