Il mais da november è stà fitg bletsch. Uschia hai en bleras parts da la Svizra pluvì u navì quasi mintga di, dal prim fin ils 25 da november.
Per part haja da dubel uschè blera plievgia sco normalmain, communitgescha l'Uffizi federal per meteorologia e climatologia. Local è la precipitaziun er stà 300% da la media d'auters onns.
En parts dal chantun Schaffusa hai dà uschè blera plievgia sco anc mai dapi ch'i vegn mesirà. Trais dis èn stads spezialmain bletschs en Svizra: ils 12 enfin ils 15 da november. En l'ost da la Svizra hai dà durant quels 100-150 milimeters precipitaziun.
Dentant n'èsi betg stà en tut las parts da la Svizra uschè bletsch. En parts dal Grischun èsi schizunt stà main bletsch che durant auters onns. E tenor l'Uffizi èsi da spetgar circa mintga trais onns tals mais cun bler plievgia.
Las temperaturas èn er stadas il november autas. E l'entir atun è en blers lieus il pli chaud dapi cumenzament da mesirar. A Genevra èn las temperaturas da settember fin november per exempel stadas 2,4 grads sur la media dals onns 1990-2020.
Quai ha er chaschunà, che la feglia da las plantas è stada verda pli ditg. Cumpareglià cun ils onns 1990-2020 è quai stà 7 enfin 12 dis pli tard ch'en media. Ils faus han purtà fitg ditg feglia verda. Dapi ch'ins ha cumenzà d'observar il 1950, han els mo purtà a duas autras occasiuns uschè tard anc feglia verda.
