En la Svizra è la primavaira 2022 stada memia chauda. Il mais mars enfin matg èn las temperaturas stadas radund 2,5 grads sur la norma. Perquai ch'i saja en il medem mument era stà memia sitg smanatschan consequenzas «fatalas» la stad, ha communitgà SRF Meteo.
Era la naiv manca – la naiv che serva sco reserva d'aua. Ils proxims mais stattan a disposiziun mo in quart da las reservas da naiv usitadas. Per cumpensar quai dovra tenor SRF Meteo adina puspè plievgia intensiva durant la stad. Uschiglio poi dar problems cun il provediment d'aua.
Matg memia miaivel
Il mais da matg è sin curs da rumper records. Tenor il servetsch da l'aura Meteonews è quest mais stà bler memia miaivel e per part er memia sitg. Localmain èn las temperaturas stadas schizunt 4 grads sur la media.
Meteonews quinta fin la fin dal mais cun urizis perlung las alps ed en il sid. Per la Svizra franzosa ed il Vallais prognostichescha il servetsch da l'aura però in grond deficit da plievgia. Qua ha il sulegl splendurà passa 30% pli savens che normalmain.
