La situaziun d'aua gronda en il Lai da Constanza è tendida. Suenter ils urizis da dumengia valia il segund aut nivel da privel, communitgescha la Confederaziun. Quai munta in privel d'inundaziuns enturn l'entir lai. Ultra da quai han ils pumpiers stuì pumpar aua or da numerus tschalers inundads.
Zunt precara è la situaziun en il vest dal Lai da Constanza, a l'uschenumnà Untersee. Là è il nivel d'aua be pli pauc sut il pli aut nivel da privel. Promenadas, parcadis ed ustarias en il liber èn per part sut aua.
Suenter ils urizis ch'i haja dà dumengia en la regiun sajan era anc dus auals ids surora ed hajan inundà parts da la vischnanca turgoviana da Berlingen, ha ditg envers l'agentura da novitads Keystone-SDA il president communal da Berlingen. La via chantunala tras la vischnanca saja perquai serrada.
Malgrà blers donns nagin stab da crisa
Sco quai che la polizia chantunala dal chantun Turgovia ha communitgà, haja dà en tut radund 120 annunzias da donns or dal chantun Turgovia. La gronda part da las annunzias haja dà pervia da tschalers inundads.
Malgrà il privel d'auas grondas al Lai da Constanta, n'ha il chantun Turgovia però anc betg proclamà in stab da crisa. Cumpareglià cun la situaziun d'auas grondas extrema l'onn 1999, saja la situaziun actuala bler pli pauc alarmanta. Il 1999 era il nivel dal Lai da Constanza 65 centimeters pli aut che mesirà actualmain.
Bovas en il chantun Lucerna
Pervia da l'aura actuala ha era il chantun Lucerna stuì prender mesiras. Perquai ch'i ha dà pliras bovas pitschnas ils dis passads han las autoritads lucernaisas evacuà in campadi a Vitznau al Lai dals Quatter Chantuns.
