Tut ha cumenzà cun l'emissiun naziunala dal prim d'avust che stat quest onn sut il motto «fortuna». Perquai è Corina Schmed, moderatura dad RTR per l'emissiun da la festa naziunala da la SSR, sa dumandada tge che fa ella ventiraivla:
Per mai è quai l'esser en il qua ed en l'uss – l’esser tar mamezza. Ma era l'esser en moviment ed il medem mument sentir mes corp, per exempel cun far sport. Tschertgar mes agens cunfins, ir al limit e bandunar mia zona da confort.
Uschia è Corina vegnida sin il sfunsar liber (apnoe). Nagliur auter saja ella probabel uschè suletta, be cun sasezza, sco sut l'aua, confruntada cun ses stadi mental – pura quietezza e plaschair. Or da questa raschun è naschida sia challenge nua ch'ella vul nudar sut l'aua 100 meters cun ina singula fladada. E quai en il Lag la Cresta.
Apnoe è il sfunsar cun be ina fladada ed è la pli veglia furma dal sfunsar. Gia en il temp da crap han umans rimnà conchiglias e spungias.
Anc oz lavuran las «Ama» dal Giapun, las «Haenyeo» da la Corea ed ils «Bajau» da l'archipel malaic cun las medemas tecnicas.
Il pled «apnoe» deriva dal grec ἄπνοια ápnoia («betg trair flad»).
En il temp modern vegn il sfunsar apnoe dentant oravant tut duvrà per la chatscha sin peschs cun l'arpuna – u sco sport.
Trenament
Il trenament en l'aua na po Corina betg far suletta, almain ina persuna sto accumpogna ella en l'aua. «La raschun è la segirezza», di Corina a l'ur dal pool en l'indriz da sport Sand a Cuira. «Sche jau surpass mes cunfins poi dar ch’jau hai in blackout. La persuna ch’accumpogna mai po uschia salvar mai en talas situaziuns precaras.»
La distanza da 100 meters en il pool ha Corina dumagnà intgins dis suenter la filmada da la contribuziun. En il lai èn las cundiziuns però pli difficilas: la temperatura da l’aua è pli bassa uschia ch’il corp dovra dapli energia, la pressiun dal sang s'augmenta ed il corp producescha dapli ormons da stress. Ina sfida è però era l'orientaziun en l’aua. Era per quella ha Corina stuì chattar ina soluziun.
L'emprima giada en il Lag la Cresta
Durant la segund'emna da matg ha Corina fatg l'emprima prova en il Lag la Cresta. L’emprim ha ella però stuì chattar ina via per fermar la suga da 100 meters tranter il lieu da partenza e la plattafurma amez il lai. Quella suga duai dar orientaziun a Corina – auter ch’en il pool na datti en il lai nagina schanza da s’orientar.
-
Bild 1 von 11Legenda: Corina Schmed è pronta per montar la suga per l'orientaziun sut l'aua. RTR
-
Bild 2 von 11Legenda: Quella duai vegnir montada tranter la puntina e la puntera che sa chatta en l'aua. RTR
-
Bild 3 von 11Legenda: Discussiun davart la situaziun. RTR
-
Bild 4 von 11Legenda: Ma avant datti gia in problem: la suga da 100 meters ha probablamain memia blers nufs. RTR
-
Bild 5 von 11Legenda: D'eleminar ils nufs cuzza in mumentin. U dus. U trais. RTR
-
Bild 6 von 11Legenda: La montascha da la suga sut la nudaglia na po questa camera da filmar betg registrar. RTR
-
Bild 7 von 11Legenda: La suga è montada. Ed uss? RTR
-
Bild 8 von 11Legenda: Ina giada guardar sche quai funcziuna. RTR
-
Bild 9 von 11Legenda: Suenter pliras emprovas èsi puspè da demontar la suga – auters visitaders na duain betg vegnir disturbads durant far bogn. RTR
-
Bild 10 von 11Legenda: Corina emprenda da l'experta da sfunsar in tric per evitar nufs futurs – nufs per evitar nufs. RTR
-
Bild 11 von 11Legenda: Sco lavur da crutsch. RTR
Cunquai che la distanza fin tar la plattafurma è però be bun 84 meters, sto Corina far ina vieuta e nudar enavos ils ulteriurs 16 meters per vegnir sin ils 100 meters.