RTR: Quant impurtanta è questa votaziun en il rom da la strategia dal clima da la Svizra?
Fabia Caduff: Quai è in'impurtanta votaziun en quest reguard. La lescha dat en la direcziun, respectivamain dat avant a la Svizra co ella duai far la midada dal clima – co la Svizra vul cuntanscher las finamiras da la cunvegna da Paris, nua ch'ils stadis han decis da vulair cuntanscher la finamira che la temperatura mundiala na crescha betg pli ferm che 1,5 grads.
Questa votaziun dad oz vegn gugent congualada cun la votaziun d'avant dus onns da la lescha da CO2. Quella ha il suveran refusà, pertge hai questa giada tanschì, tgenins èn ils motivs?
Tenor mai datti dus motivs principals: per l'ina n'è la lescha dal clima betg uschia restrictiva sco la lescha da CO2, vul dir ella na cuntegna naginas taxas supplementaras ed er nagins scumonds. La lescha dal clima porscha stimul per far la midada da clima, ma na sforza betg ella per uschè dir.
Il segund motiv è il context en quel che nus avain votà davart la lescha da CO2, retschertgas suenter la votaziun han mussà che la mobilisaziun en la champagna era enorm gronda, ma betg mo pervi da la lescha da CO2, mabain oravant tut pervi da las duas iniziativas da pesticids ch'èn stadas en il medem mument a l'urna. E quellas han er giugà ina rolla impurtanta tar il Na per la lescha da CO2.
E sche nus vulain anc prender in terz motiv: la Partida liberaldemocratica. Quella era tar la lescha CO2 plitost dividida. Tar questa votaziun era la partida quasi unanimamain per la lescha.
Il suveran ha approvà la lescha. Co vai ussa vinavant? Èsi fatg cun la lescha?
Il clima è omnipreschent en il parlament, atgnamain vai gia vinavant, saja quai cun rinforzar las energias regenerablas fin tar las discussiuns enturn la biodiversitad. Quai è ina massa che gira en il parlament. Il parlament s'occupà intensivamain cun la midada dal clima.
Natiralmain è er il squitsch extern sin la Svizra in punct che influenzescha la politica. Per exempel han discussiuns e decisiuns che vegnan fatgas en l'Uniun europeica er in'influenza sin la Svizra.
Latiers vegn che nus avain in nov minister d'energia, Albert Rösti. Ed er el vegn ad influenzar la politica da clima, e quai vegn segir interessant perquai ch'il departament era avant en mauns sanesters. Speculà vegn ch'Albert Rösti pudess chattar pli liger cumpromiss che Simonetta Sommaruga avant el, quai damai ch'el è in politicher burgais cun in parlament burgais.
Quest atun avain nus elecziuns, han quellas er in'influenza sin ils proxims pass en chaussa clima?
En mintga cas, tut tenor constellaziuns e fermezzas datti autras decisiuns. Uschia che las elecziuns han en mintga cas in'influenza saja quai sin la politica da clima u er sin la politica en tut ils auters secturs.
Fabia Caduff
Correspundenta Chasa federala
