- Gerhard Pfister na candidescha betg sco successur da Viola Amherd.
- Er il schef da la fracziun dal Center Philipp Matthias Bregy na candidescha betg.
- L'AdC infurmescha ils 20-01 davart ils proxims pass.
Gerhard Pfister è dapi la demissiun da Viola Amherd vegnì numnà savens sco pussaivel successur en la regenza svizra. Uss ha il president da l'Allianza dal Center stenschentà las speculaziuns e ditg ch'el n'haja betg mustgas da candidar. El saja sa dumandà sch'el fiss abel d'exequir quest uffizi. Sia conclusiun: ch'el dumagnass quai. Ma el haja er tschentà la dumonda sch'il post giaja a prà cun el – e quai haja el respundì cun Na, uschia declera il politicher sia decisiun en il Tagesanzeiger.
Libertad persunala
Tgi ch'enconuschia meglier el, sappia ch'el na daventass betg in cusseglier federal cuntent. Gerhard Pfister di ch'el amia il discurs, debatteschia gugent e fetschia gugent dispita. Per far quai dovria el ina tscherta libertad persunala. Quella haja el sco president da partida ma segir betg pli sco cusseglier federal.
Gerhard Pfister sa retira la stad sco president da l'Allianza dal Center, il zercladur vegn elegì la nova persuna per il presidi da l'AdC. Ch'i dettia uss duas demissiuns fetschia in zic gnervus la glieud cunquai ch'i dat differentas pussaivladads da far carriera. Sco president da partida veglia el far ses pussaivel per in cumbat fair, transparent e ruassaivel, uschia Pfister.
Er Philipp Matthias Bregy na vul betg
Ed er il schef da la fracziun dal Center, Philipp Matthias Bregy, na vul betg candidar per il sez che vegn liber en la regenza. En l’intervista cun la «NZZ am Sonntag» ha ditg il cusseglier naziunal vallesan ch’ina candidatura na vegnia per il mument betg en dumonda. Quai per motivs famigliars. Dentant ha Bregy interess da succeder a Pfister sco president da l'Allianza dal Center.
Mesemna ha la cussegliera federala da l'Allianza dal Center Viola Amherd annunziar da sa retrair. Ils 12 da mars è l'elecziun per sia successiun. Er sco candidat pussaivel vegn il cusseglier naziunal Martin Candinas numnà – el n'ha enfin uss betg anc laschà guardar en las cartas sch'el avess gust dad ir en la cursa u betg.