Allianza dal Center - Gerhard Pfister chala sco president – tgi succeda?

I saja il dretg mument per la partida, ed era per el sez. Quai ha Gerhard Pfister ditg a las medias, a chaschun dal discurs da Bavania tradiziunal da sia partida. Il temp da preparar las proximas elecziuns cumenzia pir l’atun. Vitiers termineschia la partida questa stad las lavurs vi da la nova strategia da partida 2033.

Sa decidì da far quest pass haja el en las vacanzas d’atun, ha Gerhard Pfister ditg. Ils 28 da zercladur elegia la radunanza da delegads e delegadas a Bienna ina successura ubain in successur per il post dal presidi.

9 onns èn avunda

Quai ha ditg il president da l'Allianza dal Center Gerhard Pfister cun annunziar da vulair chalar la stad che vegn. Persequità l’entira carriera dal politicher dal chantun Zug al timun da la partida ha noss correspundent en la Chasa federala Adrian Camartin. El metta al lieu per nus la decisiun da Gerhard Pfister.

Adrian Camartin

Correspundent Chasa federala

Avrir la boxa da profil Serrar la boxa da profil

Adrian Camartin rapporta per RTR da Berna. Sco correspundent persequitescha el la politica naziunala, quai vul dir decisiuns dal Cussegl federal e debattas dal Parlament federal. El rapporta dentant era en general da temas svizzers ed en spezial dals Rumantschs en la Bassa.

 I saja il dretg mument da surdar la batgetta. Quai ha Gerhard Pfister ditg il glindesdi. Èsi propi il dretg mument?

Ord vista strategica, quai che pertutga la partida, crai jau schon ch’igl è il dretg mument da far quest pass. Nus essan anc en l’emprima mesadad da la legislatura. E quai è in bun mument da surdar il post. La successura u il successur da Gerhard Pfister ha uschia anc flot temp da metter agens accents, plazzar persunas e preparar la partida per las elecziuns federalas dal 2027. Ultra da quai è la partida gist vi d’elavurar ina nova strategia per ils onns fin il 2033. Cunquai èsi propi il dretg mument da far questa midada che n’è betg simpla.

 E lura crai jau era ch’igl è il dretg mument per Gerhard Pfister da far quest pass. 9 onns en questa funcziun laschan schon enavos fastizs. President da partida èn ins durant 24 onns, set dis ad emna. Ed era sch’el ha ditg che dad esser president da partida da l’Allianza dal Center saja in’incumbensa fantastic ha el er agiuntà – ch’i saja era ina lavur strapatschusa.

Avant 9 onns ha Gerhard Pfister surpiglià il timun da la PCD, questa stad chala el sco president da l’Allianza dal Center. En quest temp è capità bler. Tge partida surdat el en novs mauns?

Ina tut autra che quella ch’el aveva surpiglià. A Gerhard Pfister è gartegià, quai che strusch insatgi avess patratgà ch’i saja pussaivel. El ha franà il digren da votantas e da votants. Ed a chaschun da las davosas elecziuns federalas il 2023 ha l’Allianza dal Center pudì augmentar sia quota d’electurs ed electuras.

Contribuì a questa gronda midada han cunzunt duas decisiuns che Gerhard Pfister ha inizià e realisà. La fusiun da la PCD cun la PBD – ed en quest connex la midada dal num da la partida, davent cun l’etichetta catolica e persuenter in cler accent sin il center dal spectrum politic. Retrospectiv pon ins dir, igl è stà la dretga decisiun.

Pia ina bilantscha tras e tras positiva.

Gliez lura era betg. E quai ha tenor mai era da far cun sia persuna, il caracter cumpetitiv e provocant da Gerhard Pfister. El ha centralisà la partida. Ils gremis naziunals èn ozendi pli impurtants e cumondan la direcziun. Per ina partida ch’è enragischada en las regiuns ruralas e tegna aut il federalissem – è quai stà bunamain ina midada da paradigma.

Che l’Allianza dal Center è dentant anc adina ina partida cun in vast spectrum da posiziuns, mussan adina puspè ils represchentants da la partida en il Cussegl dals chantuns. Bain inqual giada han lezs sepulì ils plans da lur president ed uschia mussà a Pfister ses cunfins.

Strusch che la demissiun è vegnida annunziada, han era gia cumenzà las speculaziuns tgi che pudess suandar a Pfister al timun da l’Allianza dal Center. Tge nums fan il mument la currella a Berna?

Ils pli differents. Gia annunzià interess han il cusseglier naziunal Reto Nause da Berna, ed il schef da la fracziun da l’Alllianza dal Center en il parlament federal, il Vallesan Philipp Matthias Bregy.

Sch’ins dumonda ils parlamentaris da la partida crodan dentant anc auters nums. Per exempel quels dals cussegliers naziunals Stefan Müller-Altermatt da Soloturn u Vincent Maitre da Genevra u Priska Wismer-Felder da Lucerna.

Ed ils Rumantschs Martin Candinas e Stefan Engler?

Jau hai telefonau cun omadus e Martin Candinas ha ditg a mai il suandant:

El haja avant nov onns ponderà ina candidatura. Mo dapi lura sajan sias prioritads sa midadas.

Il cusseglier dals chantuns Stefan Engler n'ha era betg fatg lungas e ditg:

Pia – nagins rumantschs a la testa da l'Allianza dal Center.

E co vai ussa vinavant cun Gerhard Pfister? Dad el vegn ditg ch'el dettia ussa giu il presidi per daventar successur da la Cussegliera federala Viola Amherd.

Gea, quai hai jau era udì. Il medem vegn era adina detg da Martin Candinas, ch'el avess mustgas da daventar cusseglier federal. Tant Gerhard Pfister sco era Martin Candinas laschan qua betg guardar en las cartas ed accentueschan che quella dumonda sa tschentia lura cura che Amherd demissiuneschia e betg il mument. Mo cler, Gerhard Pfister avess schon il profil per far il pass en la regenza.

13 politichers han prì posiziun davart ina pussaivla candidatura

Suenter che Gerhard Pfister ha annunzià ch'el chala sco president da l’Allianza dal Center, sa tschenta la dumonda tgi che surpren l'uffizi – 13 pliticras e politichers han prendì posiziun envers SRF. Il successur u la successura duai vegnir elegida questa stad.