Quests 347 milliuns francs èn 2,5% pli pauc ch'ils onns avant. Dals onns 2026 fin 2029 duess l’agricultura Svizra mo anc survegnir 13,67 milliardas francs.
Per il Grischun ed era per la Svizra en questas diminuziuns radicalas, di il president da l’Uniun purila dal Grischun. Tenor Thomas Roffler ha quai ina gronda influenza sin la paja da las famiglias da purs. En Svizra datti 50’000 purarias, en Grischun èn quai 2’000. Pia survegnan ils purs e las puras grischunas 14 milliuns pli pauc. Sch'ils pajaments directs van enavos e sch'ils custs da vita s’augmentan è il pretsch per ils products impurtant.
«La gronda part vegn da las entradas dals products, perquai avain da guardar che nus pudain far buns pretschs al martgà», di Thomas Roffler. La paja dals purs e puras en Svizra guarda ora suandanta: Trais milliardas or dals pajaments directs, era numnads subvenziuns, e 12 milliardas or dal gudogn dals products.
Nov parlament pudess midar insatge
Sch'i dat la fin finala pli paucs raps per purs e puras decida il parlament a Berna. E cun quai che la politica naziunala è dapi las ultimas elecziuns naziunalas pli dretga, è Thomas Roffler optimistic ch'i sa mida anc insatge tar quests pajaments.
«Nus vegnin ad avair in contact stretg cun ils nov parlamentaris e parlamentarias. Jau sun plain fidanza ch'il nov parlament annullescha intginas da questas scursanidas», explitgescha Roffler. Ils purs e las puras na pudessan betg decider, nua ch’els stritgan quests raps en lur puraria. La Confederaziun decida, en tge program dals pajaments directs che pli paucs raps vegnan a cular.
