Ir ora en la natira – quai è daventà per bleras persunas bler pli impurtant dapi il temp da corona. Spezialmain giasts da surmar chattan ins – tenor las cifras da Schweiz Tourismus – adina pli savens en las muntognas svizras. Ma era la populaziuns svizra scuvra dapi la pandemia da nov lur agen pajais. Els apprezieschan en quest connex alloschis pitschens ed uschia era regiuns periferas turisticas.
Quai è ina gronda schanza per interpresas d'alloschament pitschnas en il territori da muntogna. Ina schanza ch'ils manaschis pon dentant mo realisar, sche lur infrastructura è tgirada e sche quella correspunda a las pretensiuns autas dals giasts.
Savens èn cunzunt ils bogns in problem. Ils giasts vulan ina tualetta en la stanza d'hotel e betg en il corridor ch'els ston anc parter cun auters giasts.
Per quai dovri investiziuns ch'hotels u pensiuns pitschnas na pon savens betg far or da l'atgna bursa. Stuair investir per pudair tegnair la svieuta – quai enconuschan blers possessurs e bleras possessuras d'alloschis. Cura ch’els èn als cunfins finanzials, dat perquai l’Agid svizzer per la muntogna sustegn. En sia campagna tematica da quest onn appellescha la fundaziun da sustegnair interpresas pitschnas d’alloschament en las muntognas cun investiziuns per in'infrastructura moderna ed adattada al lieu.
En il territori da muntogna è il turissem suenter l’agricultura il patrun il segund impurtant. Tenor Schweiz Tourismus dependa circa in quart da tut las plazzas da lavur en las muntognas dal turissem. Brigitta M. Gadient, presidenta da Svizra Turissem, di: «En il chantun Grischun porta il turissem dapli ch’in quart dal PIB e bunamain mintga terza plazza da lavur è directamain en il turissem.» Quai è cumpareglià cun l’entira Svizra diesch giadas dapli. Perquai èsi spezialmain impurtant da proteger questas plazzas da lavur.
Gronda prontadad da far la donaziun
Tut en tut ha l’Agid svizzer per la muntogna sustegnì il territori muntagnard il 2024 cun radund 45 milliuns francs per 1'030 projects. Quai è stà tant sco anc mai en l’istorgia da la fundaziun, di Kurt Zgraggen, gestiunari da l’Agid svizzer per la muntogna.
Uschia purschain nus agid per gidar sasez en il territori da muntogna svizzer e faschain frunt a la depopulaziun en questas regiuns.
Persvadids da l’impurtanza dal sustegn èn era las bleras donaturas ed ils blers donaturs: Passa 53'000 persunas èn sa mussadas solidaricas cun la populaziun muntagnarda l’onn 2024. Las donaziuns a l’Agid svizzer per la muntogna han importà passa 27 milliuns francs.
Dus manaschis grischuns han gia profità
Dus hoteliers dal Grischun – Curdin Brugger e Dominique Mayor – han modernisà lur manaschis cun sustegn da l'Agid svizzer per la Muntogna. Investiziuns en l'infrastructura e la modernisaziun sajan indispensablas per il success da las interpresas d'alloschament. Ellas motiveschian il persunal e signaliseschian als giasts ch'il hotel s'occupi da lur confort.