Plirs chantuns han reducì la durada da la quarantina per persunas ch'èn infectadas cun il coronavirus. Ils chantuns Tessin, Basilea Citad, Vad e Giura han decretà la quarantina da 7 dis, enstagl da 10 sco enfin ussa. Quai duai valair a partir da glindesdi che vegn.
Uschia suondan els la recumondaziun da Confederaziun e medis chantunals. Quels avevan annunzià il plan da reducir la quarantina, però era appellà als chantuns da realisar quai gia ussa en atgna reschia. Entras questa mesira veglian ins evitar stretgas da persunal pervia da la varianta dad omicron che sa derasa en il mument fermamain. La gievgia aveva l'Uffizi federal da sanadad annunzià var 19'000 novas infecziuns cun il coronavirus aifer in di.
Pratica actuala nuntegnibel
La pratica actuala na possian ins betg pli mantegnair aveva scrit Kathrin Huber, vicesecretaria generala tar la Conferenza svizra da las directuras e dals directurs chantunals da sanadad, sin dumonda da l'agentura da novitads Keystone-SDA. Perquai ch'ils cas creschian da di tar di, stoppian ins surlavurar las reglas.
Ulteriuras midadas anc betg confermadas
Detagls concrets n'ha Huber betg tradì. Ils chantuns fetschian dentant bain da coordinar lur agir, fin che la Confederaziun decidia. Il portal da medias Blick, ch'è tenor atgnas indicaziuns en possess dad in scriver dal BAG, rapporta plinavant che persunas ch'han gia survegnì il booster na stoppian betg pli ir en quarantina. Il medem valia per quels e quellas ch'hajan survegnì la segunda vaccinaziun avant pli pauc che quatter mais.
Gia durant l'ultima conferenza da medias dals experts da la Confederaziun aveva Rudolf Hauri, il president da las medias e dals medis chantunals, mess la tematica sin maisa.