Ils acziunaris e las acziunarias da la Credit Suisse dattan ina lecziun a la direcziun: A la radunanza generala han prest 60% refusà da dar distgargia per l'onn da fatschenta 2020 da la segund gronda banca svizra. Els suondan cun quai a la recumandaziun da cussegliaders dal dretg da vuschar.
A l'ultima radunanza generala era questa distgargia per l'onn 2020 vegnida spustada. La raschun eran grondas perditas da la Credit Suisse en connex cun il fond da chadainas da furniziun «Greensill» ed il hedgefond «Archegos». Il president dal cussegl d'administraziun Axel Lehmann è sa mussà trumpà da questa decisiun. Il cussegl d'administraziun stopia uss discutar co vinavant.
La decisiun da betg dar descharscha è surtut in donn dad image per la direcziun - n'ha dentant naginas consequenzas directas. L'onn da fatschenta 2021 han las acziunarias ed ils acziunaris acceptà cun passa 77%. La banca ha nudà ina perdita da bunamain 1,6 milliardas francs.