«Sper las pistas da skis marcadas datti ina strivla da dus meters che vegn anc segirada dals runals. Cura ch'ins banduna questa strivla da dus meters, van ins gia giud pista», declera Nicolas Duc, docter da giurisprudenza e president da la Cumissiun svizra per la prevenziun d'accidents sin pistas da sport da naiv (CUS), en l'emissiun da RTS «On en parle» dals 29 da schaner 2025.
L'ir cun skis ordaifer las pistas preparadas è dal tuttafatg legal en Svizra. «Ins sto mo resguardar intginas reglas e prender insaquantas mesiras da precauziun che correspundan a la sauna raschun avant che sa metter sin viadi, cunzunt sch'il privel è grond», di Nicolas Duc.
Ins stoppia s'equipar cun in apparat da tschertgar en lavinas, ina pala ed ina sonda per pudair prestar emprim agid e deliberar ina persuna cura ch'ina lavina avess da vegnir giu. L'element principal saja dentant la scolaziun. En divers territoris da skis da las Alps vegnian organisads curs per sensibilisar e scolar per questa activitad che pretendia – sco mintga autra activitad sportiva – ina retscha d'abilitads, explitgescha el.
Mesiras da precauziun, impurtantas per las assicuranzas
Nicolas Duc conferma: Sch’ins è sa blessà, ma ha prendì las mesiras da precauziun recumandadas, n’exista nagin privel che las assicuranzas dettian chastis spezials. «En quest cas suppon’ins che Vus hajas studegià la ruta, essas s’infurmada davart il rapport da lavinas e forsa prendì si contact cun l’incumbensà per la segirezza dal territori da skis per savair nua ch’ins po ir. Sch’in accident capita, na datti nagin chasti spezial, perquai che l’ir cun skis è in’activitad sportiva sco mintg’autra, sch’ins fa quai raschunaivel», declera el.
E sche l'accident capita en accumpagnament d'in magister da skis u d'ina guida da muntogna? «Questa persuna surpiglia ina posiziun da garant. Mintgatant sa tschenta per quella la dumonda, sch'ella duai refusar ses clients, sche l'abilitad d'ir cun skis n'è betg gronda avunda. Quai n'è betg adina agreabel, dentant era quai tutga tar l'obligaziun d'in garant u d'ina garanta», respunda Nicolas Duc.
Tge capita, sche la preparaziun u l'ir cun skis da la victima n'è betg buna avunda? «Sche la societad d'assicuranza po cumprovar che Vus n'essas betg propi buns avunda e vus avais prendì ina gronda ristga, pudess ins dar chastis en furma che l'assicuranza vegn scursanida u stritgada. Quai fiss alura in cumbat dals experts», resumescha el.
Provocar ina lavina ed eventualas consequenzas penalas
Ans imaginain ch’in skiunz distatgia ina lavina sper la pista. Ina lavina è arrivada giu sin la pista e blessa in auter skiunz. Tgi è responsabel per quai? «Sche la lavina vegn en cas da grond privel giu da la pista e sch’ella arriva sin la pista marcada, exista il privel che la persuna vegn sentenziada penalmain pervia d’impediment dal traffic public. Questa condemnaziun penala ha consequenzas per la protecziun da las assicuranzas concernent ils custs per il salvament, per il transport, per l’evacuaziun da blessads e per la tschertga da persunas», avertescha Nicolas Duc.
L'expert agiunta che sche las persunas ch'han chaschunà las lavinas vegnian blessadas, «ristga e greva negligientscha èn dus cas, nua che l'assicuranza cunter accidents po refusar il pajament da l'indemnisaziun dal salari durant la perdita da lavur».
Nicolas Duc calma dentant: «Sche las cundiziuns èn bunas, fa l'ir cun skis sper la pista bler plaschair. Sch'ins fa quai en in rom segir, na datti nagin motiv da diabolisar el. Ins sto far quai mo a moda conscienta e segira.